Zuma 'nie gepla oor sy grade'
2012-02-04 08:46
Kaapstad – Pres. Jacob Zuma het sewe eredoktorsgrade, maar het nog nooit enigeen gevra om dié titel te gebruik as hulle na hom verwys nie.
Vrae hieroor het ontstaan nadat die parlement op 26 Januarie in sy amptelike dokumentasie na die president as “dr. J.G. Zuma” verwys het in ’n kennisgewing dat weermaglede gesekondeer is om die polisie te ondersteun.
Mac Maharaj, Zuma se woordvoerder, het Vrydag by navraag gesê ofskoon plaaslike en buitelandse instellings doktorsgrade aan hom toegeken het, verwys hy nie na homself as doktor nie.
“Hy het nog nooit gevra dat enigiemand na hom verwys as doktor nie, maar hy keer hulle ook nie om dit te doen nie.”
Zuma het doktorsgrade van die Universiteite van Fort Hare, Zoeloeland, die Mediese Universiteit van Suid-Afrika en Limpopo in Suid-Afrika ontvang.
Hy is ook deur die Texas Southern University, die American University of Nigeria en die University of Abomey-Calavi in Benin vereer vir sy bydrae tot onderwys. Laasgenoemde het hom ook vereer vir sy bydrae tot vrede, stabiliteit en volhoubare ontwikkeling in Afrika.
– Volg Nuus24 op Twitter
- Die Burger