Zuma-neef, twee van Aurora dalk gou aangekla
2011-10-23 09:57
Johannesburg – Pres. Jacob Zuma se neef en sy twee direkteure gaan aangekla word sodra die ondersoek na die plundering van die Pamodzi-myn in Desember afgehandel is.
Khulubuse Zuma, Zondwa Mandela en Thulani Ngubane, direkteure van Aurora Empowerment Sys tems, word deur aanklagte in die gesig gestaar dat hulle die Maatskappyewet oortree en versuim het om finansiële rekords en ander dokumente oor hul sake met Pamodzi voor te lê.
Die ondersoek is in camera in Pretoria gehou om diegene te beskerm wat moes getuig oor hoe Aurora meer as R500 miljoen in bates van die myne kon plunder.
Konsultante wat gehuur is om die myne in Grootvlei en Orkney te bestuur, sal waarskynlik ook aangekla word weens hul versuim om dokumentasie te verskaf.
Nie die direkteure van Aurora of die konsultante het die dokumentasie verskaf soos hulle belowe het nie, het Johan Engelbrecht, woordvoerder vir die gesamentlike likwidateurs wat die ondersoek lei, bevestig. Die likwidateurs beskou dié versuim as nog ’n poging om die ondersoek te vertraag, sê hy.
Mondelinge ondervragings is gehou om te probeer bepaal watter dokumente die ondersoekspan van Aurora vereis en sittings is uitgestel om Aurora tyd te gee om die dokumente in orde te kry.
Maar hoewel Aurora en sy regsverteenwoordiger, Ahmed Amod, onderneem het om die dokumente teen 15 September te lewer, het dit nie gebeur nie, sê Engelbrecht.
Die ooreenkoms oor die dokumente is toe geskrap om verdere vertragings te voorkom, bykomende koste te beperk en die ondersoek so gou moontlik af te handel.
Oor die moontlikheid dat Aurora se direkteure en konsultante aangekla gaan word, sê Engelbrecht die likwidateurs “behou hulle die reg voor” om aanklagte aanhangig te maak, maar bronne na aan die ondersoek het aan City Press, Rapport se susterkoerant, gesê hulle gaan aangekla word sodra die ondersoek afgehandel is om verdere vertragings te voorkom.
Pogings om telefoniese kommentaar van Zuma en Ngubane te kry het misluk, terwyl Mandela buite bereik was.
Volg Nuus24 op Twitter
- Rapport