Zuma-neef se BMW's, meubels opgeveil om skuld te delg
2012-04-24 09:12
Johannesburg – Drie luukse motors en huishoudelike goedere wat aan Khulubuse Zuma behoort, is opgeveil om R10 miljoen te betaal wat aan Protea Coin Security geskuld word, het ‘n berig Dinsdag gelui.
Zuma is pres. Jacob Zuma se neef, en een van die direkteure van Aurora Empowerment Systems, die maatskappy was as voorkeurbieër verwyder is om die insolvente Pamodzi-goudmyne te koop.
The Times berig dat BMW’s, ‘n platskerm-televisie, ‘n paar Anthem-versterkers, ‘n eetkamertafel, kroegstoele, stoele, ‘n mikrogolfoond, wasmasjien en ‘n tuinstel Maandag onder die hamer gekom het.
Die bates, wat vir R160 000 opgeveil is, is gekonfiskeer ná ‘n uitvoeringsbevel deur Protea Coin.
Protea Coin se prokureur, Nic Viviers, het verlede week aan The Times gesê dat dié maatskappy nou kan aansoek doen vir ‘n uitvoeringsbevel vir Zuma se onroerende eiendom.
Die maatskappy probeer om die R10 miljoen terug te kry wat aan Aurora geskuld word vir dienste wat hy aan Pamodzi se Grootvleimyn in Springs, oos van Johannesburg, gelewer het.
Aurora – wie se ander direkteur Nelson Mandela se kleinseun, Zondwa Mandela is – word daarvan beskuldig dat hy infrastruktuur by die myne vernietig het, sowel as die verlies van meer as 5 300 werke veroorsaak het.
– Volg Nuus24 op Twitter
- SAPA
