Zuma-neef moet R10 m. opdok, sê hof
2012-01-13 07:46
Johannesburg – Die hooggeregshof in Pretoria het Khulubuse Zuma, voorsitter van die gelikwideerde Aurora Empowerment Systems, Donderdag gelas om meer as R10 miljoen aan die Protea Coin-groep te betaal.
Regter Ben du Plessis het dié bevel toegestaan nadat Protea Coin die hof genader het omdat die mynmaatskappy nie ’n skikkingsooreenkoms nagekom het nie.
Benewens die R10 034 198 moet Zuma, ’n neef van pres. Jacob Zuma, ook 15,5% rente op die bedrag betaal, terugwerkend tot 24 November 2010.
Hy is boonop gelas om die koste van Protea Coin se aansoek te dek.
Luidens hofstukke het Protea Coin in Mei 2010 met ’n aansoek vir die likwidasie van Aurora begin, maar het die maatskappy twee maande later ’n skikkingsooreenkoms met Aurora bereik.
Daarvolgens sou Aurora in Julie 2010 R250 000 aan Protea Coin betaal, gevolg deur ’n verdere R1 miljoen in Augustus en die orige R11,1 miljoen in September daardie jaar.
Zuma het ook belowe om Protea Coin van ’n persoonlike akte van borgstelling vir Aurora se skuldlas ten opsigte van die veiligheidsmaatskappy te verskaf, wat hy wel in Oktober 2010 gedoen het.
Volgens die voorwaardes sou die borg afdwingbaar bly totdat Aurora se pligte teenoor Protea Coin nagekom is.
Protea Coin het Zuma weer hof toe gesleep nadat sy maatskappy nie die R1 miljoen in Augustus 2010 of die res van die geld betaal het nie. Aurora is uiteindelik in Oktober verlede jaar gelikwideer nadat die hooggeregshof in Pretoria ’n likwidasie-aansoek van R9 miljoen deur Copper Eagle, een van Aurora se kontrakteurs, bekragtig het.
Aurora is aangestel om die bestuur van twee van Pamodzi se goudmyne – die Grootvlei-myn by Springs en die Orkney-myn – oor te neem nadat Pamodzi in 2009 gelikwideer is.
Aurora is verwyder nadat die maatskappy se direkteurs daarvan beskuldig is dat hulle die infrastruktuur by die myne vernietig het, wat daartoe gelei het dat meer as 5 300 mense hul werk verloor het.
’n Verhoor oor Pamodzi se likwidasie, waaronder die rol wat Aurora daarin gespeel het, is tans hangend voor die meester van die hooggeregshof. – Sapa
Volg Nuus24 op Twitter
- Die Burger