Zuma 'moet jammer sê oor God-uitsprake'
2011-02-06 17:18
Johannesburg - Die Demokratiese Alliansie het Sondag gesê President Jacob Zuma hoort alle Suid-Afrikaners om verskoning te vra vir sy "gebruik van geloof om politieke punte aan te teken".
Die DA het gereageer op opmerkings wat Zuma Saterdag in Mthatha in die Oos-Kaap gemaak het.
Zuma het luidens berigte ‘n stem vir die ANC gelyk gestel aan ‘n keuse om hemel toe te gaan. ‘n Stem vir ‘n ander party sou wees “om die duiwel te kies”.
Volgens die DA het Zuma ook in sy toespraak gesê mense wat ‘n ANC-lidmaatskapkaart dra sal maklik by die hemel inkom.
“As jy vir die ANC stem, kies jy ook om hemel toe te gaan. As jy nie vir die ANC stem nie, dan moet jy weet jy kies ‘n man wat ‘n vurk dra... wat mense kook,” het Zuma gesê.
“As jy ‘n ANC-lidmaatskapkaart dra, is jy geseënd. As jy daarbo kom, is daar verskillende kaarte wat gebruik word, maar as jy ‘n ANC-kaart het, sal jy na die hemel deurgelaat word.”
Die DA het in ‘n verklaring gesê gewone Suid-Afrikaners sal Zuma se opmerkings aanstootlik en onaanvaarbaar vind.
“Sy woorde is opruiend en gevaarlik, aangesien hulle teen religieuse lyne af wil mobiliseer en sade van verdeeldheid in ons gemeenskappe strooi.
“Hierdie is ‘n daad van skaamtelose politieke- en religieuse afpersing – dié soort kullery mag dalk die norm in outokrasieë wees, maar daar is nie plek daarvoor in ons grondwetlike demokrasie nie.
“Mnr. Zuma moet onvoorwaardelik om verskoning vra vir dié opmerkings.”
- Volg Nuus24 op Twitter
- SAPA