Zuma moet ingryp in De Doorns – Zille
2012-11-14 08:17
Kaapstad – Helen Zille, premier van die Wes-Kaap, het pres. Jacob Zuma gevra om in te gryp by die plaaswerkers se loondispuut in De Doorns, het haar kantoor gesê.
"Die gevolge van die huidige krisis sal baie erg wees vir die Wes-Kaap en die land as 'n geheel indien dit nie onmiddellik aangespreek word nie," het Zille in 'n brief aan Zuma gesê.
Zille het die president gevra om Mildred Oliphant, minister van arbeid, te vra om die situasie te hanteer.
Zille het ook 'n beroep op Cosatu gedoen om deel te neem aan besprekings sonder om geweld aan te hits.
"Dit is 'n skande dat 'n formele Cosatu-verklaring aangekondig het 'Marikana het na die plase gekom'."
Tony Ehrenreich, Wes-Kaapse Cosatu-voorsitter, het Woensdag gesê die doel van die samesprekings moet wees om beter lone en werksomstandighede vir werkers te beding.
Plaaswerkers in die De Doorns-gebied het verlede week begin staak en eis 'n daaglikse loon van R150 en beter werkstoestande.
Pieter Groenewald, Vryheidsfront Plus-woordvoerder, het intussen Cosatu se oproepe vir geweld gekritiseer.
Groenewald het Dinsdag gesê hy gaan die Suid-Afrikaanse Menseregtekommissie (SAMRK) vra om die "korrektheid" van Ehrenreich se stellings te ondersoek.
Volgens hom het Ehrenreich na bewering aan plaaswerkers gesê: "Daar is reeds bloed op die plaaswerkers en tensy dit nie ophou nie, sal daar bloed op die boere van hierde plase wees.
"Ons sal die grond afneem en dit aan die regmatige eienaars gee. Ons is vandag hier om oorlog te verklaar. Ons is teen geweld, maar as dit is wat gedoen moet word om 'n slegte boer in 'n rigting te dwing, dan moet hulle in daardie rigting geslaan word."
Groenewald het gesê Ehrenreich het toe aan die plaaswerkers gesê dat diegene wat werkers soos honde behandel, geslaan moet word tot hulle stop.
Lt. kol. André Traut, polisiewoordvoerder, het gesê gebiede wat die ergste geraak word is De Doorns, Ceres, Robertson, Prince Alfred Hamlet en Somerset-Wes.
Die polisie het versperrings opgerig en verkeer is na alternatiewe roetes herlei.
'n Polisieman is Dinsdag gehospitaliseer nadat 'n betoger hom met 'n klip gegooi het. Altesaam 10 mense is Maandag in hegtenis geneem op aanklagte van openbare geweld en intimidasie.
– Volg Nuus24 op Twitter
- SAPA
