“Zuma moet betrokke raak by stakings”
2010-08-27 13:33
Johannesburg - Die Suid-Afrikaanse Menseregte Kommissie (SAHRC) het ‘n beroep op pres. Jacob Zuma gedoen om betrokke te raak by onderhandelinge met staatsdienswerkers.
“Die kommissie is van mening dat ‘n inmenging op die hoogste vlakke nodig is om die staking tot ‘n einde te bring,” het Vincent Moaga, SAHRC-woordvoerder, in ‘n verklaring gesê.
Die SAHRC het ‘n brief aan Zuma en ook aan die vakbond Cosatu gestuur om hul kommer oor die staking uit te spreek.
“Die SAHRC is ook baie bekommerd oor die negatiewe uitwerking wat die staking op die reg tot onderwys en toegang tot gesondheidsdienste gaan hê,” lees die verklaring.
Moaga sê dat indien die staking voortgaan die land nog ‘n skooljaar, wat deur swak matriekuitslae gekenmerk sal word, in die gesig staar.
“Dit is in tye soos hierdie dat Suid-Afrika op sy goeie tradisie van die oplossing van geskil en onderhandelinge moet terugval en die betrokke partye moet bymekaarkom om die probleem op te los,” sê Moaga.
Volg Nuus24 op Twitter.
- SAPA