'Zuma moet bedank oor skietery' – Malema
2012-08-18 17:08
Johannesburg – Pres. Jacob Zuma en Nathi Mthethwa, minister van polisie, moet bedank nadat mynwerkers by Lonmin se Marikana-bedrywighede gesterf het, het Julius Malema, geskorste leier van die ANC se jeugliga (ANCYL), gesê.
Malema het mense in Wonderkop, waar 34 mense vroeër vandeesweek in ‘n skietery met die polisie afgemaai is, toegespreek.
Die geskorste leier sê die minister van polisie moet ook bedank, aangesien die polisie die stakers onder sy bevel geskiet het.
“Hy moet bedank omdat hy daarin misluk het om sy take uit te voer.”
Malema het aan die skare gesê polisiebeamptes was veronderstel om hulle te beskerm en nie om hulle dood te maak nie.
Malema, wat sy ondersteuning aan die stakende mynwerkers toegesê het, het ‘n beroep op hulle gedoen om nie te onttrek nie, maar om standvastig oor hul vereistes te wees.
Hy het gesê die polisie het die mense geskiet om Cyril Ramaphosa, lid van die ANC se Nasionale Uitvoerende Komitee, se belange te beskerm. Malema beweer Ramaphosa het aandele in Lonmin.
“Lonmin het ‘n hoë politieke verbinding gehad; dis hoekom ons mense doodgemaak is. Hulle is doodgemaak om die aandele van Cyril Ramaphosa te beskerm,” het Malema gesê.
Die geskorste leier van die ANCYL sê die president moet uittree omdat hy daarin misluk het om die burgers van die land te beskerm.
Altesaam 34 mynwerkers is dood toe die polisie Donderdagmiddag met skerp ammunisie op stakende werkers geskiet het.
Riah Phiyega, die nasionale polisiehoof, het vroeër op ‘n mediakonferensie die sterftesyfer bevestig. Meer as 78 mense is ook in die voorval beseer, het sy gesê.
Altesaam 259 mense is in hegtenis geneem vir aanklagte van onder andere openbare geweld, moord, poging tot moord, die besit van gevaarlike wapens en opsetlike saakbeskadiging.
Volg Nuus24 op Twitter
- SAPA
