Zuma-lyfwag se verhoor gaan voort
2010-01-18 09:36
Durban - Een van pres. Jacob Zuma se lyfwagte, wat aangekla is van poging tot moord, is vrygespreek op 'n aanklag van minagting van die hof, het die Independent Online Maandag berig.
Landdros Fariedha Mohamed het gevind dat Muzingaye Dladla nie met opset verlede November op die dag wat sy verhoor moes begin, nie in die hof verskyn het nie.
Sy het ‘n geskrewe verklaring van ‘n psigiater, Ashwin Valjee, aanvaar wat gesê het dat Dladla op daardie dag by hom was vir ‘n konsultasie en dat hy “groot emosionele en fisiese pyn deurgemaak het”.
Dladla is aangekla van poging tot moord op die oud-polisieinspekteur Dirk Matthee (85), nadat hy in Junie 2008 op die snelweg op Matthee se voertuig geskiet het.
Matthee sê ‘n voertuig het hom van die vinnige baan op die snelweg forseer en nadat dit verby hom gery het, het iemand van binne die voertuig menigte skote na sy voertuig gevuur.
Dladla se verhoor moes verlede jaar begin, maar sy regsverteenwoordiger het ‘n nota van Valjee oorhandig om te sê dat hy siek is. Dit is aanvanklik nie aanvaar nie omdat dit oor die presiese tydperk van die verhoor gestrek het.
Die saak sal weer in Februarie hervat word.
- Sapa