Zuma looi media se beriggewing
2011-06-16 07:17
Kaapstad – Pres. Jacob Zuma het hom Woensdag by Jimmy Manyi, die kabinetswoordvoerder, aangesluit deur die media se beriggewing oor die regering skerp te kritiseer.
Hy het koerante se dekking van die debat Dinsdag oor die presidensie se begrotingsrede voorgehou as voorbeeld van die media wat die regering se boodskap nie behoorlik aan Suid-Afrikaners oordra nie.
Volgens hom is daar eerder op die opposisie se aanvalle op hom as op die inhoud van sy boodskap gefokus.
“Daar is behoefte aan media wat ruimte skep vir rolspelers, ook die regering, om hul standpunte te stel en hul planne oor te dra, selfs al stem media- eienaars en redakteurs nie daarmee saam nie,” het hy gesê.
Hy het gesê Kaapse koerantlesers kon gister nie ten volle lees wat in die debat gesê is en self ’n oordeel vel nie. “ ‘MPs launch attack on Zuma’, die Cape Times se hoofberig, fokus op wat die opposisie gesê het sonder om lesers ’n kans te gee om te lees wat in die eerste plek gesê is.
“Ons vertrou die media sal ernstig selfondersoek instel en sulke kwessies intern debatteer omdat hulle aantygings van skendings van persvryheid maak as sulke sake uitgewys word,” het Zuma gesê.
Dit volg op Manyi se uitlatings verlede week dat die staat “gefrustreerd is” omdat sy boodskap nie tot op grondvlak uitkom nie en hy net kritiese dekking kry.
Hy het Dinsdag in Durban bygevoeg die media is die “filter” waardeur die staat sy boodskap probeer oordra en dat dit onvoldoende is.
Die nuutste kritiek op die media word volgende week opnuut bekyk wanneer die parlement se portefeuljekomitee oor kommunikasie ’n openbare verhoor oor diversiteit in die drukmedia hou.
- Zuma het in sy repliek amper geen kwessies gehanteer wat opposisiepartye tydens Dinsdag se debat gelug het nie.
Hy het in reaksie op kritiek oor sy hantering van mnr. Julius Malema, ANC-jeugleier, net gesê dit moet met die ANC opgeneem word: “Ek is hier om die presidensie se begroting voor te lê.”
- Beeld