Zuma-kunswerk 'onherkenbaar' beskadig

2012-05-22 11:19

(@dalington, Twitter)

Kaapstad – Die omstrede kunswerk van pres. Jacob Zuma is “heeltemal onherkenbaar” nadat mense verf oor die skildery in die Goodman-galery in Johannesburg uitgegooi het, het eNews pas berig.

Sowat 100 mense het Dinsdagoggend by die galery in Johannesburg saamgedrom toe die voorval plaasvind. Die skildery is nou afgekordon.

Volgens die nuusbron is rooi en swart verf oor The Spear uitgegooi.

eNews berig twee mense is verantwoordelik hiervoor. Dié twee is ná die voorval deur sekuriteitswagte van die galery aangehou.

Brett Murray se omstrede kunswerk toon die president met sy gulp oop en sy penis blootgestel. Die kunswerk is vir R136 000 by die Goodman-galery in Johannesburg verkoop.

Die ANC, die Goodman-galery en City Press het Dinsdagoggend in die Johannesburgse hooggeregshof teen mekaar te staan gekom sodat die regerende party se aansoek aangehoor kan word oor 'n omstrede skildery van Zuma.

Intussen is die saak tot Donderdag uitgestel sodat die saak deur 'n vol bank regters aangehoor kan word. Die saak sal regstreeks op televisie uitgesaai word.

Volg Nuus24 op Twitter  

- Nuus24