Zuma kry heli-blad, kliniek by huis
2009-12-04 08:47
Lizel Steenkamp
Kaapstad - Die regering is besig om woonkwartiere, ’n kliniek en ’n helikopterlandingsblad by pres. Jacob Zuma se woning in Nkandla in KwaZulu-Natal op te rig.
Die woonkwartiere moet die personeel wat na Zuma se veiligheid omsien, huisves. Die landingsblad word spesiaal gebou om te verseker Zuma kan veilig met ’n helikopter daar land. Die kliniek word só ingerig dat die president in ’n noodgeval eers gestabiliseer kan word.
Vincent Magwenya, Zuma se woordvoerder, kon nie Donderdagaand sê hoeveel dié omvattende uitbreidings gaan kos nie. Hy het gesê die departemente van verdediging en polisie sal hiervoor betaal.
Die woordvoerders van albei dié departemente was gisteraand egter stomgeslaan omdat hulle glad nie van die projek bewus is nie. “Dis die eerste keer dat ek hiervan hoor,” het Zweli Mnisi, woordvoerder van die departement van polisie, gesê.
“Ek weet nie hiervan nie,” het Siphiwe Dlamini, kommunikasiehoof van die departement van verdediging, gesê.
Koketso Sachane, woordvoerder van die departement van openbare werke, het bevestig dié departement onderneem die bouwerk namens bogenoemde departemente. Hy wou nie verder kommentaar lewer nie.
Magwenya het gesê die bouwerk moes al jare gelede, toe Zuma adjunkpresident was, plaasgevind het. Dit het nooit gebeur nie. Die veiligheidspersoneel is sedertdien noodgedwonge in die president se private woning gehuisves.
Magwenya hou vol Zuma het nie vir die verbeterings gevra nie. “Die president sal in elk geval, nadat sy termyn verstryk het, geregtig wees op dieselfde veiligheid en mediese sorg as toe hy die amp beklee het.”
- Die Burger