'Zuma kós ons geld,’ sê Guptas
2011-03-06 06:51
Ferial Haffajee en Adriaan Basson
Ajay en Atul Gupta glo hulle verloor miljoene rande oor die volgehoue negatiewe publisiteit oor hul vriendskap met pres. Jacob Zuma en sy familie.
In ’n onderhoud met Rapport se susterkoerant, City Press, in die Midrand-kantore van hul koerant, The New Age, het die geïrriteerde broers, omring deur hul sakevennote, Jagdish Parekh en Duduzane Zuma, gesê:
* Hulle dink nie die swartekonomiesebemagtigingstransaksie met die staalreus ArcelorMittal sal deur die maatskappy se aandeelhouers goedgekeur word nie;
* Die omset van Sahara, hul rekenaarmaatskappy, is in die vorige boekjaar met ’n miljard rand gehalveer weens negatiewe publisiteit; en
* Regeringsministers besoek hul luukse landgoed in Saxonwold, Johannesburg, as vriende en nie in hul amptelike hoedanighede nie.
Oor SEB:
Die Guptas ontken dat hulle bevoordeel word deur Suid-Afrika se wetgewing oor swart ekonomiese bemagtiging (SEB). Die teenoorgestelde is waar, sê Ajay.
“Sahara het sy eie bemagtigingstransaksie beklink. Ons het 26% vir swart mense gegee en Nedbank het die transaksie gefinansier.”
Atul voeg by: “Ons almal weet die Gupta-familie het eers in 1993 op die toneel verskyn... ’n Mens kan eintlik sê ons is soos die Europeërs.”
Staatstenders:
Ajay: “Sou jy een sent in Sahara se boeke vind wat ek uit die regering gemaak het, ontbloot dit.”
Sahara was een van ses maatskappye wat gedurende die vroeë 2000’s ’n gedeeltelike tender in Gauteng gekry het.
Atul sê die maatskappy is “500 eenhede in 500 skole” toegeken en dat sy hart seer is oor hulle nie méér gekry het nie.
ArcelorMittal en Duduzane Zuma:
Gevra oor ’n moontlike belangebotsing met hóm wat raad gee oor die transaksie, het Ajay geantwoord:
“Hy (Lakshmi Mittal, ArcelorMittal-voorsitter) het my raad gevra toe hy die SEB-transaksies wou doen, en as ’n vriend. Dit het niks amptelik met ArcelorMittal Suid-Afrika te make nie.”
Ajay sê hy ken Mittal “baie goed”. Hy het Gupta gevra oor die moontlikheid van ’n “nuwe toetreder”.
“Ek het Dudu (Duduzane Zuma) voorgestel.”
In ruil vir finansiering van sowat $50 miljoen het hy (Ajay) gevra vir ’n aandeel in die konsortium.
Die V&A Waterfront-transaksie:
Die Guptas meen hul aandeel in die onlangse aankope word oordryf.
Ajay: “Ek bid ons kry ons ’n bietjie geld daaruit.”
Hul vriendskappe met kabinetsministers:
Ajay ontken regeringsbeleidsrigtings of -tenders word by hul Saxonwold-landgoed beklink, maar hy erken hulle het talle vriende onder politici.
Onder dié is Zuma, Tokyo Sexwale, minister van nedersettings (wat verlede Saterdag daar gekuier het om “Gogo-atjar” vir die Gupta-matriarg te bring en ’n Zoeloe-maaltyd saam met hulle te geniet), en Susan Shabangu, minister van mynwese.
Gevra hoekom ander topsakelui nie dieselfde toegang geniet nie, sê Ajay: “Want hulle wil die toegang hê vir ’n bietjie voordeel... Ek gebruik nie dié ding om kommersiële voordeel daaruit te trek nie.
“Daarom is mense meer gemaklik met my. Sou ek ’n minister uitvra oor sy begroting sal hy my nie weer groet nie.”
Ajay sê daar is ’n “mikroskoop” op die familie sedert Zuma in 2007 tot ANC-president verkies is.
- Rapport
