Zuma kap skoolvakbond
2009-09-22 09:08
Midrand - Pres. Jacob Zuma het gister op die eerste dag van die vakverbond Cosatu se tiende nasionale kongres hard en reguit gepraat oor gebreke in die onderwys en vakbonde se aandeel daarin.
Hy het die Suid-Afrikaanse Demokratiese Onderwysersunie (Sadou) by name genoem en gesê swart kinders bring te min tyd in die klaskamer deur.
Meer as 2 600 afgevaardigdes van 21 vakbonde het by die Gallagher Estates-konferensiesentrum in Midrand geluister terwyl sprekers – onder wie Zuma, S’dumo Dlamini (Cosatu-president), dr. Blade Nzimande (SAKP-leier) en Zwelinzima Vavi (Cosatu-hoofsekretaris) – die regerende alliansie se lof besing het.
Zuma het sy toespraak gebruik om die ANC se gesag te bevestig en hul onversetlikheid oor sekere kwessies, soos die party se afkeer in vakbonde in die weermag, te benadruk.
Onderwys was hoog op die sakelys en elke spreker het in sy spreekbeurt daarna verwys.
Die ANC-leier, wat ’n luide ontvangs gekry het, het verwys na ’n verslag wat toon voormalige wit skole se onderwysers bestee ses en ’n half uur per dag in die klaskamer, terwyl hul swart eweknieë slegs drie en ’n half uur klasgee.
“Dit is ’n ernstige kwessie. Ons mag, sonder dat ons dit besef, dit wat apartheid daargestel het, handhaaf. Só skep ons ’n situasie waar arm skole en arm leerders agtergeblewe bly.”
Zuma het Sadou – die grootste vakbond in die onderwys – gemaan om ’n leerkultuur te vestig om te verseker skole word sentrums van uitnemendheid.
Nzimande het gewaarsku: “Ons sit op ’n tydbom.” Hy het syfers aangehaal om sy punt te staaf en gesê 2,8 miljoen jong mense tussen 18 en 24 jaar “sit by die huis en niksdoen”.
Nzimande het ’n skreiende aanval op oudregter Johann Kriegler gedoen en hom “arrogant en alwetend” genoem.
“Sommiges maak asof hulle die enigste bewakers van die Grondwet is...
“Terwyl ons besig was om dood te gaan (in die struggle), het sommige van hulle knus op die regbank gesit en apartheidswette afgedwing.”
Die grootste twispunt tussen die ANC en sy vennote is die kwessie rakende vakbonde in die weermag. Dlamini het driftig gesê nie eens die Mbeki-regering het gewaag om vakbonde in die weermag te verbied nie en Cosatu sal dié planne beveg.
Zuma het egter kort daarna met ’n breë glimlag gesê vakbonde in die weermag is op pad uit en die nuwe militêre dienskommissie gaan vakbonde vervang. “Ons is daarvan oortuig dis ’n kwessie van nasionale veiligheid.”
- Die Burger