Zuma 'is weer verkeerd geadviseer'
2011-11-07 09:07
Kaapstad - Pres. Jacob Zuma is klaarblyklik weer verkeerd geadviseer oor die samestelling van sy kommissie van ondersoek na die aankoop van wapens – anders sou sittende regters waarskynlik nie as leiers van die kommissie aangestel gewees het nie.
So het prof. Pierre de Vos, grondwetkenner van die Universiteit van Kaapstad, gesê in reaksie op die tameletjie wat nou in die skoot van die regters van die konstitusionele hof beland het.
Die wapen-aktivis Terry Crawford-Browne van Kaapstad het ’n hangende geding teen Zuma oor die kommissie. Dié geding, wat ingestel is voordat Zuma sy kommissie aangekondig het, word op 17 November in die konstitusionele hof aangehoor.
Crawford-Browne het verlede Maandag hofstukke ingedien en onder meer sy kommer uitgespreek oor die feit dat sittende regters in die kommissie dien. Hy het gevra vir ’n bevel van die hof waaruit dit duidelik sal blyk dat die regters “kennis neem” van die feit dat sittende regters die kommissie gaan lei.
Zuma het Vrydag teruggekap en gesê Crawford-Browne kan nie in dié laat stadium met ’n nuwe argument by die agterdeur inglip nie.
“Pres. Zuma se betoog hou steek met die feit dat die kwessie van sittende regters in ’n kommissie soos dié ’n baie belangrike kwessie is wat nie sommer vinnig afgehandel kan word nie,” het De Vos gesê.
“Maar aan die ander kant het Crawford-Browne ook ’n baie belangrike punt beet as hy sê dat die vraagstuk oor sittende regters afgehandel behoort te word voordat die kommissie begin sit.
“Anders kan dit maklik gebeur dat belangrike getuies halfpad deur die sitting van die kommissie sê hulle weier om te getuig omdat die sittende regters bloot pionne van die regering is.”
Die ideale oplossing is dat die konstitusionele hof albei partye genoeg tyd gee om betooghoofde oor die sittende regters in te dien sodat die kwessie in die konstitusionele hof betoog kan word, al moet die verhoor uitgestel word.
– Volg Nuus24 op Twitter
- Die Burger