Zuma is ’n groot flop! - betogers
2010-03-02 07:18
Sonja van Buul, André Damons en Jody Nel
‘Zuma is ’n groot flop.”
Dié kreet het Maandag oor die Vaaldriehoek, suid van Johannesburg, weergalm terwyl betogers in Boipatong, Boiketlong, Sebokeng, Thembelihle in Lenasia en Sharpeville betoog en wydverspreide woede oor swak dienslewering opgevlam het.
Die onluste het volgens insp. Kinnie Steyn, polisiewoordvoerder van Vanderbijlpark, omstreeks 05:00 begin toe paaie uit die woongebiede met klippe en brandende buitebande versper is.
Die polisie moes op verskeie plekke met rubberkoeëls losbrand om die orde te herstel.
Duisende mense het in verskillende plekke aan betogings deelgeneem, maar dit was volgens ’n gemeenskapsleier wat hom net as Baba voorgestel het, spontaan.
’n Polisiebeampte is in Boiketlong beseer toe hy die oggend deur ’n betoger in die bobeen geskiet is. Hy is na die Sebokeng-hospitaal geneem.
Volgens supt. Maria Mazibuku, Sebokeng-polisiewoordvoerder, het die betogers eers Waterdalweg in Boiketlong versper voordat die polisiebeampte geskiet en ’n trok van ’n goederetrein by die Houtheuwel-treinstasie langs dié plakkerskamp aan die brand gesteek is.
“Twee vroue is beseer toe die polisie met rubberkoeëls geskiet het om reg en orde te herstel.”
Die oproeriges het later Mo-shoeshoestraat in Sebokeng versper.
Treine van Metrorail is ’n geruime tyd vertraag omdat rommel eers van die treinspoor verwyder moes word.
’n Ander groep betogers het terselfdertyd Seisostraat in Sharpeville met brandende buitebande en klippe versper.
In Boipatong is twee polisievroue, insp. Michelle Stephenson en kapt. Ria Sibeko, lig beseer toe oproeriges hul voertuig van alle kante met klippe bestook het.
Verskeie winkels van buitelandse eienaars is hier geplunder en vyf mans is volgens Steyn in hegtenis geneem weens openbare geweld.
“Ons ondersoek ook ’n saak van opsetlike saakbeskadiging teen die klipgooiers wat die polisievoertuig van Stephenson en Sibeko erg beskadig het.”
Een van die winkeleienaars wat onder die woedende betogers deurgeloop het, was Maandagmiddag haastig besig om sy winkel te verlaat.
In Thembelihle het mense gekla omdat hul huise sedert die bestaan van dié township nie elektrisiteit het nie.
Volgens mnr. Simphiwe Segodi, ’n woordvoerder van die gemeenskap, is hul enigste opsie om krag te steel (van die straatligte se kragdrade).
’n Watertekort en die swak padtoestande is nog van die gemeenskappe se grootste klagtes.
Die Vaaldriehoek-townships was Maandagmiddag rustiger ná beloftes van ’n vergadering tussen die onderskeie gemeenskappe en regeringsverteenwoordigers, maar kleiner groepe was steeds oproerig.
“Ons is môre, oormôre en die dag daarna weer hier,” het die betogers belowe.
- Beeld