Zuma is geen pous nie, kap min.
2010-03-19 06:25
Liesl Peyper, Die Burger
Kaapstad - Pres. Jacob Zuma is nie ’n pous nie, maar ’n mens met sterk en swak punte.
Met dié woorde het mnr. Jeff Radebe, minister van justisie, Donderdag in die parlement vir die feilbare Zuma in die bresse getree en reguit gesê die ANC was in 2007 in Polokwane onder geen wanindruk toe hy Zuma tot leier verkies het nie.
Hy het ook uit die Bybel aangehaal wat lui dat ’n mens nie moet oordeel nie en eers die “balk uit jou eie oog” moet haal voordat jy die splinter in iemand anders se oog sien.
Radebe en dr. Lindiwe Sisulu, minister van verdediging, het Donderdag tot Zuma se verdediging gekom toe ’n mosie van wantroue teen die president gedebatteer is.
Cope, wat die mosie ingedien het, het taamlik bedroë van die debat afgekom toe ’n gewysigde mosie van vertroue in Zuma se leierskap uiteindelik in die Nasionale Vergadering aanvaar is.
Die party het veral onder Sisulu deurgeloop, wie se stellings by tye erg persoonlik was.
Sisulu het gesê Cope bestaan uit “permanent woedende” individue wat ’n demokratiese verkiesing verloor het.
Aan die party se parlementêre leier, eerw. Mvume Dandala, het sy gesê hy moet wegkom uit Cope omdat dit ’n vernietigende bakleiery om posisies is wat onder sy “biskopkleed” wettig verklaar word.
“Loop terwyl jy nog kan en gaan dien die kerk.”
Dandala, wat die debat ingelei het, het gesê Zuma het die eed wat hy met sy inhuldiging afgelê het op ’n flagrante wyse verbreek.
Athol Trollip, die DA se parlementêre leier, het Cope se mosie gesteun en gesê Zuma se optrede, of gebrek daaraan, het Suid-Afrikaners se vertroue in hom geskaad.
Ook Patricia de Lille, OD-leier, en Bantu Holomisa, leier van die UDM, het die mosie gesteun.
Volgens De Lille was Suid-Afrikaners tot nog toe geduldig met Zuma, maar is die mense nou moeg om na sy gereelde verskonings te luister.
Holomisa het gesê sy party het nie langer vertroue in Zuma en die regering nie.
“Die voerbakke het nie verander nie – net die varke wat daaruit eet.”
- Die Burger