Zuma in die sop oor 'godslasterlike' uitlating
2011-02-05 16:02
Johannesburg - Pres. Jacob Zuma het onder skoot gekom oor 'n uitlating dat Suid-Afrikaners wat kies om vir opposisiepartye te stem "hel" kies, het die SABC Saterdag berig.
Zuma, wat in Zoeloe gepraat het, het glo gesê mense wat vir die ANC stem, kies "hemel" terwyl diegene wat vir opposisiepartye stem "hel" kies.
Hy het 'n groep mense in Mthatha in die Oos-Kaap toegespreek as deel van die ANC se registrasieveldtog voor die 2011 plaaslike verkiesings.
Kenneth Meshoe, president van die ACDP, het gesê Zuma se kommentaar is 'n skande.
Meshoe het gesê geen engele sal ANC-kleure dra nie, en dat Zuma se uitlating godslasterlik was.
"... Ek is geskok om te hoor dat die Suid-Afrikaanse president so 'n belaglike stelling sal maak. Dis nie net skokkend nie maar ook teleurstellend om te hoor hoe die staatshoof, wat 'n voorbeeld van integriteit moet stel, kies om homself belaglik te maak voor die nasie deur so misleidend te wees.
"Hierdie is niks anders as misleidend nie. Niemand kan in die hemel kom op grond van hulle lidmaatskap van 'n politieke party nie. Vir hom om aan te voer dat die engele in die hemel ook die kleure van die ANC dra, is niks anders as godslasterlik nie.
- Volg Nuus24 op Twitter
- SAPA