Zuma het vir armes gejok, sê Solidariteit

2012-11-20 17:20

Pretoria – Die vakbond Solidariteit sal Woensdag skenkings aan prominente welsynsorganisasies maak as deel van 'n veldtog teen voorgestelde wetgewing oor swart ekonomiese bemagtiging wat maatskappye effektief kan dwing om teen potensiële begunstigdes te diskrimineer op grond van ras.

Die donasies sal by die Bethlehem-nedersetting in Pretoria oorhandig word.

Die vakbond sal tydens dié geleentheid ook 'n ope brief aan pres. Jacob Zuma rig oor die voorgestelde wetgewing, wat volgens die organisasie beloftes verbreek wat vroeër aan mense by die nedersetting gemaak is.

Zuma het vroeër gedurende 'n besoek aan dié informele nedersetting gesê die regering wil besluite maak wat alle Suid-Afrikaners bevoordeel, ongeag van ras of geloof.

Zuma het ook gesê niemand moet uitgesluit word by die toekenning van welsynshulpbronne nie.

Johan Kruger, woordvoerder vir Solidariteit, het gesê die nuwe voorgestelde wetgewing bepaal dat maatskappye slegs punte vir ekonomiese bemagtiging sal ontvang as 100% van die begunstigdes by sulke skenkings swart is.

"Ons sal gedurende ons besoek 'n tjek aan welsynsorganisasies oorhandig om die feit te beklemtoon dat sulke organisasies negatief geraak sal word as die nuwe bemagtigingswetgewing aanvaar word," het Kruger gesê.

– Volg Nuus24 op Twitter.

- SAPA