Zuma het niks verkeerd gedoen – minister

2013-01-28 08:15

Pretoria – Thulas Nxesi, minister van openbare werke, het gesê pres. Jacob Zuma het niks verkeerd gedoen in verband met die bouwerk by Nkandla nie, al moet nóg twee verslae oor die koste van opgraderingswerk by sy huis in Nkandla bekend gemaak word, berig Eyewitness News.

Nxesi het Sondag die bevindings van 'n departementele taakspan bekend gemaak. Die span het bewerings ondersoek dat meer as R200 miljoen in openbare fondse gebruik is om Zuma se huis op te knap.

Die minister het gesê die bewerings is vals en dat die staat die koste van R206 miljoen vir sekuriteit, opgraderings en konsultante betaal het.

"Waar die president is, moet ons seker maak daar is sekuriteit."

Nxesi het ook gesê die regering is weens die publieke ontevredenheid oor die ontwikkeling genoop om die inligting bekend te maak.

Die minister het egter gesê die verslag sal nie bekend gemaak word nie.

Die ouditeur-generaal en die openbare beskermer ondersoek ook die kwessie.

– Lees meer hier

– Volg Nuus24 op Twitter