'Zuma het jeug verlaat' – DA
2012-06-17 17:23
Johannesburg – President Jacob Zuma het gewys hy het geen belangstelling in jongmense nie deur nie in die land te bly op 16 Junie nie, het die DA Jeug Sondag gesê.
Mbali Ntuli, voorsitter, het gesê dit was ‘n “klap in die gesig van jong mense” dat Zuma daaruit onttrek het om ‘n Jeugdag-saamtrek in Port Elizabeth by te woon en eerder na ‘n G20-vergadering in Mexiko gegaan het.
“Deur nie in Suid-Afrika te bly op Jeugdag nie, een van die belangrikste dae in Suid-Afrikaanse geskiedenis, het President Zuma weereens gedemonstreer dat hy geensins daarin belangstel om die jeug van die Suid-Afrika te betrek nie,” het Ntuli gesê.
“Die fasade van kommer oor jeugkwessies word dun. Dit het begin met die President se weiering om die jeugloonsubsidie te implementeer, ondanks oorweldigende bewyse en ondersteuning ten gunste van die implementering daarvan.”
Collins Chabane, minister in die Presidensie, het Zuma vervang by die gebeurtenis by die Wolfson-stadion in Silvertown.
Voordat Chabane Saterdag sy Jeugdag-toespraak kon hou, het inwoners van Silvertown by ‘n diensleweringsbetoging buite die stadion betrokke geraak.
Inwoners het gesê hulle is nie ingelig oor die Jeugdag-gebeurtenis nie.
“Die betogers het aan ons gesê hulle is nie behoorlik gekonsulteer oor die gebeurtenis nie en het gekla oor die gebrek aan dienslewering,” het maj. Ernest Sigobe, polisiewoordvoerder, gesê.
Die polisie moes tussenbeide tree om die skare te kalmeer, wat bande verbrand en paaie afgesper het.
“Ons het aan hulle verduidelik dat hul betoging onwettig was en het hulle versoek om die regte prosedures te volg om hul griewe bekend te maak.”
“Gelukkig het hulle geluister en die situasie was daarna normaal.”
- Volg Nuus24 op Twitter
- SAPA
