Zuma het glo Shaik-aansoek, en de Kock gesien
2010-01-11 15:07
Johannesburg – Die DA het Maandag heftig reageer nadat president Jacob Zuma tydens ‘n televisieonderhoud ontken het dat Schabir Shaik aansoek gedoen het om presidensiële kwytskelding.
Luidens ‘n verklaring uitgereik deur die DA het Zuma glo tydens ‘n onderhoud gesê dat hy nie kan reageer op die vraag of hy presidensiële kwytskelding aan Shaik sal verskaf nie, omdat Shaik nooit aansoek gedoen het daarvoor nie.
“Ek het niks voor my nie. Eers as daar ‘n aansoek voor my is kan jy my vra. Hoekom moet ek reageer as ek nie eers ‘n aansoek ontvang het nie?” het Zuma tydens ‘n onderhoud op e.tv gevra.
Volgens die DA het hulle egter op 19 Oktober 2009 vasgestel dat Schaik aansoek gedoen het.
“Die presidensie het Schaik se aansoek verlede jaar in ‘n verklaring bevestig. Ons het ‘n kopie van daarvan uitgereik,” het die DA Maandag gesê.
Die opposisieparty bevraagteken Zuma se optrede en wou ondermeer weet of hy net “vergeet” het daarvan of “eenvoudig net nie die waarheid” praat nie.
Eugene de Kock:
Die presidensiële woordvoerder het Maandag ook bevestig dat Zuma wel verlede jaar ‘n ontmoeting met die voormalige Vlakplaas-bevelvoerder en veroordeelde apartheidsera-moordenaar Eugene de Kock gehad het.
“Dit was in April verlede jaar. Hy het ‘n versoek gemaak om die president te sien en dit is toegelaat. Ek kan nie die inhoud van die besprekings bekendmaak nie,” het Vincent Magwenya, presidensiële woordvoerder gesê.
– Sapa