Zuma het glo 20ste kind
2010-01-31 09:17
Johannesburg – Presidensiële woordvoerders was nie Saterdagaand beskikbaar om op die Sunday Times-storie kommentaar te lewer wat beweer dat president Jacob Zuma ‘n kind by Irvin Khoza se dogter het nie.
Die koerant het ongeïdentifiseerde bronne aangehaal, maar die dogter van Orlando Pirates-baas, Sonono Khoza (39), ontken alle bewerings.
“Ek weet nie waarvan julle praat nie. Ek weet beslis nie waarvan julle praat nie,” het sy glo aan die Sunday Times gesê voordat sy die oproep beëindig het.
Toe haar ma, Matina, uitgevra is oor die nuwe kleinkind en of Zuma die pa is, het sy gesê: “Nee, ons is nie opgewonde nie”. Sy het later gesê sy kan nie oor die saak praat nie.
Sonono het op 8 Oktober verlede jaar die lewe geskenk aan baba Thandekile Matina Zuma, slegs drie maande voordat die president met sy vyfde vrou getrou het.
Die baba is vier maande oud en is glo in haar pa se naam geregistreer. As dit die geval is, het Zuma nou 20 kinders. Hy het 19 kinders by sy eks-vrou, Nkosazana Dlamini-Zuma en sy ander vroue en meisies.
Volgens ‘n familievriend het 'n afvaardiging van KwaZulu-Natal in Desember verlede jaar names Zuma besoek afgelê by die Khoza-gesin om vergoeding (inhlawulo) te bespreek wat betaal moet word as ‘n buite-egtelike kind gebore word.
Zuma se motorstoet is glo op 17 Januarie by die Khoza-woning in Soweto gesien waar hy omtrent ‘n uur saam met Sonono en haar ma spandeer het.
Sonono is geskei en het twee kinders uit ‘n vorige huwelik. Sy werk in die bemarkingsafdeling van Absa se hoofkantoor in Johannesburg.
- Sapa