Zuma, Ramaphosa vat ANC-topposte

2012-12-18 12:46

Kaapstad – President Jacob Zuma is Dinsdag by die ANC se konferensie in Mangaung met 'n oorweldigende meerderheid as leier van die regerende party herverkies.

Zuma het 2 983 stemme en sy teenstander, Kgalema Motlanthe, het 991 stemme ontvang. 'n Totaal van 3 977 afgevaardigdes het gestem.

Cyril Ramaphosa is die ANC se nuwe adjunkpresident.

Ramaphosa het Mathews Phosa en Tokio Sexwale uitgestof om as die president se toekomstige troonopvolger gekies te word.

Motlanthe het sy nominasie vir die posisie van adjunkpresident van die hand gewys, wat beteken dat hy nie langer deel is van die ANC se leierskapstrukture nie.

Ramaphosa het 3 018 stemme ontvang terwyl Phosa 470 en Sexwale 463 stemme gekry het.

Baleka Mbete is met 3 010 stemme as die nuwe voorsitter van die ANC aangewys terwyl Thandi Modise 939 stemme ontvang het.

Gwede Mantashe is as die party se sekretaris-generaal herverkies (3 058 stemme) terwyl Fikile Mbalula 901 stemme gekry het.

Jessie Duarte is onbetwis in die posisie van adjunksekretaris-generaal bevestig.

DEEL JOU MENING: Hoe voel jy oor dié uitslae? Laai jou mening hier.

Volg Nuus24 op Twitter. 

– Nuus24