Zuma gereed vir leierskapstryd
2012-12-16 11:30
Bloemfontein – Daar is "niks verkeerd" met ANC-lede wat benoemings aanvaar en meeding om posisies in die party se leierskap nie, het pres. Jacob Zuma Saterdag gesê.
"Mense dink daar is iets verkeerd daarmee om benoemings te aanvaar. Daar is niks verkeerd nie," het hy onder luide toejuiging van gaste by die Progressive Business Forum-gala-ete gesê.
Adj.pres. Kgalema Motlanthe het benoemings aanvaar om Zuma by die ANC se nasionale konferensie in Mangaung te vervang.
Zuma het die voorbeeld gebruik van toe Harry Gwala teen die voormalige ANC-leier Walter Sisulu te staan gekom het, terwyl hy geweet het hy gaan verloor.
"Harry Gwala het teen Walter Sisulu te staan gekom... en as hy tien stemme gekry het, sal dit te veel wees."
Zuma het gesê toe Gwala gevra is hoekom hy meegeding het om die pos, het hy gesê dit was om jong lede van die ANC te leer oor demokrasie.
Die president het ook gesê in die 100 jaar bestaan van die party, het die ANC gegroei van 'n organisasie van mense wat as "terroriste" gesien is, na die regerende party van die land.
"Baie organisasies het gekom en gegaan en die ANC groei steeds."
Hy het gesê die ANC word dikwels as korrup uitgekryt, maar die bewerings is onwaar.
"Voor 1994 as jy oor korrupsie gepraat het, sou jy waarskynlik ongenooide gaste kry," het hy geskerts.
"Ons het maniere geskep om korrupsie te beveg en ons word gesien as die mees korrupte organisasie."
– Volg Nuus24 op Twitter
- SAPA
