Zuma gelooi oor Malema
2011-06-15 08:26
Kaapstad. – Julius Malema, ANC-jeugleier, is nou ’n besliste nasionale politieke twispunt.
Pres. Jacob Zuma het Woensdag uitdrukkingloos gesit toe hy deur opposisie-politici gewaarsku is dat Malema se uitsprake tydens die munisipale verkiesing ernstige gevolge vir nasiebou en stabiliteit kan inhou as dit net so gelaat word.
Athol Trollip, DA-leier, Mosiuoa Lekota, Cope-leier, én dr. Pieter Mulder, VF+-leier, het in die debat oor die presidensie se begrotingsrede – wat Zuma in die Nasionale Vergadering ter tafel gelê het – verwys na Malema se uitsprake buite Kimberley dat wit mense misdadigers is omdat hulle grond van swart mense gesteel het.
Zuma het geen reaksie getoon nie toe Trollip aan hom gesê het “die uiters opruiende en verdelende” uitlatings deur Malema is onaanvaarbaar. Wat dit volgens Trollip erger maak, is dat Zuma bloot reageer deur te sê sy idees moet met hom gedebatteer word.
“Wanneer hy dan wel uitgedaag word, gooi hy die spreekwoordelike vloermoer en weier om te debatteer!”
Lekota was meer reguit en het gesê Zuma het die verpligting wat die Grondwet op hom plaas – om nasiebou en eenheid te bevorder – geminag omdat hy nié teen Malema opgetree het ná sy Kimberley-uitlatings nie.
“Daar is niks méér strydig met die nalatenskap van oudpres. Nelson Mandela of die gees van die Grondwet as sulke uitlatings nie. Die president, deur nie iets te sê nie, is in der waarheid aandadig aan Malema se gedrag.
“Enige land wat sy jeugdiges leer om ander te haat nét omdat hul gelaatstrekke ligter as myne is, of om die reg van iemand om ’n lied te sing waarin hy vra dat ander landsburgers geskiet word verdedig, is in gevaar om die pad van Rwanda te loop.
“U, meneer die president, het dit toegelaat, aangemoedig en die vryheidstryd, ons nasie en Afrika in die steek gelaat,” het Lekota gesê.
Mulder het op dié tema voortborduur: “Begrafnisplakkate vir me. Albertina Sisulu het gelui: ‘Albertina Sisulu: nasiebouer en onselfsugtige leier.’ Kan jy jou ’n plakkaat voorstel met: ‘Julius Malema: nasiebouer en onselfsugtige leier’ ”
Hy het gevra of daar te veel aandag aan Malema gegee word, maar gesê hy kan nie geïgnoreer word nie omdat daar oorgenoeg voorbeelde van lande is waar uitsprake deur populistiese leiers tot konflik gelei het.
“Is dit ’n krisis?
“Ja, as sulke probleme geïgnoreer word, sal dit een word en verhoudings tussen Suid-Afrikaners permanent beduiwel.”
Dene Smuts (DA) het in die debat aangedui sy sal Zuma amptelik versoek om die voorgestelde Wet op die Beskerming van Inligting terug te stuur wetgewer toe indien dit nie genoeg aangepas word nie. Sy het hom daaraan herinner sy eie regsprobleme het tot ’n einde gekom toe sy regspan toegang tot geheime inligting gekry het. Onder dié wet sou die besit en gebruik daarvan onwettig gewees het.
Volg Nuus24 op Twitter
- Die Burger