Zuma gekap oor Malema, 5 departemente
2011-12-18 06:57
Carien du Plessis en Piet Rampedi
Johannesburg – Cassel Mathale, premier van Limpopo, het Saterdag die eerste salvo afgevuur teen pres. Jacob Zuma, ANC-leier, in die aanloop tot die ANC se verkiesingskongres volgende jaar.
Mathale het aan die begin van Limpopo se provinsiale verkiesingskonferensie verskeie besluite gekritiseer wat met Zuma verbind word.
Hy het onder meer uitgevaar oor die skorsing van Julius Malema as leier van die ANC-jeugliga en die kabinet se besluit om vyf departemente in Limpopo onder staatsbestuur te plaas.
Mathale het skerp kritiek gelewer in sy provinsiale politieke verslag wat aan meer as 1 000 afgevaardigdes by die Universiteit van Limpopo voorgelê is.
Hy het onder meer gesê dat die jeugliga getug moet word as die organisasie foute begaan, maar dat “drakoniese stappe” onnodig is.
Mathale het ook gewaarsku dat die jeugliga dikwels die “uitkoms van die ANC se politieke byeenkomste bepaal”.
Talle ANC-lede meen Malema se skorsing van vyf jaar is te erg en hulle sien dit as ’n poging van Zuma om sy politieke teenstanders uit te skakel.
Malema het Saterdag in die voorste ry op die verhoog saam met senior provinsiale en nasionale ANC-leiers gesit.
Intussen het honderde ondersteuners van Mathale, wat staan vir herverkiesing as provinsiale ANC-voorsitter, gedans en Zuma singend gespot.
Hulle het onder meer verwys na Zuma se opmerkings tydens sy destydse verhoor op aanklag van verkragting dat hy ná seks gestort het om te verhinder dat hy die MI-virus opdoen.
Konferensie-afgevaardigdes wat Mathale se teenstander, dr. Joe Phaahla, adjunkminister van kuns en kultuur, steun, het gesing en die handgebaar gemaak soos wanneer die skare wil hê ’n plaasvervanger in sokker moet opgestuur word.
Dit is dieselfde gebaar wat gebruik is toe sommige afgevaardigdes in 2007 wou hê pres. Thabo Mbeki moes vervang word.
Teen Saterdagmiddag het dit gelyk asof die provinsiale verkiesingstryd kop-aan-kop is. Die stemmery sou Saterdagaand begin. Adj.pres. Kgalema Motlanthe is luid toegejuig toe hy die konferensie geopen het.
Hy het gewaarsku dat goeie regering in Limpopo gekortwiek sal word as die groep wat wen die ander groep marginaliseer en van regeringsposte uitsluit. As afgevaardigdes volgens voorafopgestelde lyste stem, kan die beste leiers vir die provinsie uitgesluit word.
Die gebruik van dié lyste – waar elke faksie sy kandidate vooraf uitstippel – het in 2007 in die ANC begin.
Motlanthe het gewaarsku die lyste veroorsaak ’n geskarrel om leiersposisies en het gevra dat die strydende faksies “opmaak” in belang van die land.
Te midde hiervan was die verdeeldheid duidelik in die stampvol Onkgopotse Tiro-saal en op die verhoog. Malema het aanvanklik langs Mathale gesit en was minstens een stoel weg van sy politieke vyand, Joe Maswanganyi, sekretaris-generaal van die ANC in Limpopo.
Maswanganyi het later stoele met Malema geruil om langs Mathale te sit, waar hy ingevolge protokol hoort.
Malema en Maswanganyi het glad nie gepraat nie en skaars na mekaar gekyk.
Dit was te midde van afgevaardigdes wat mekaar om die beurt uitgejou het.
- Rapport