Zuma gaan na Libië om konflik op te los
2011-03-16 07:01
Kaapstad - Pres. Jacob Zuma gaan binne enkele dae saam met vier ander staatshoofde na Libië om as bemiddelaars in die konflik tussen rebelle en die regime van kol. Muammar Gaddafi op te tree.
“Die situasie is besig om in ’n burgeroorlog te ontaard,” het Suid-Afrika se adjunkminister van internasionale sake, Marius Fransman, Dinsdag in die parlement aan die media gesê.
Zuma is deel van ’n hoëvlakpaneel wat deur die Afrika-unie (AU) afgevaardig is om die situasie op grondvlak waar te neem.
Die ander lede van die komitee bestaan uit die staatshoofde van Mauritanië, Kongo (Brazzaville), Mali en Uganda.
Fransman kon Dinsdag nie bevestig of die paneel ook met Gaddafi gaan praat nie.
Intussen het die ministeriële woordvoerder, Clayson Monyela, bevestig Suid-Afrika is besig om ’n resolusie van die VN dat bates van die Gaddafi-regime bevries moet word, in werking te stel.
“Die sleutelsaak is dat geld Suid-Afrika nie moet verlaat en beland in die hande van mense wat in die resolusie geïdentifiseer word nie.”
Volgens Monyela het die ministerie briewe aan alle tersaaklike departemente en finansiële instellings geskryf om seker te maak die resolusie word toegepas.
Volgens Fransman het die AU se Veiligheidsraad op ’n vergadering in Ethiopië besluit om ’n afvaardiging na Libië te stuur.
“Rebellemagte wat aan die terugval is, kla oor die gebrek aan tasbare ondersteuning van buitelandse regerings en vrees verdere aanvalle van die Libiese leër en pro-regime- magte. Suid-Afrika ondersteun die AU se beroep dat lugaanvalle onmiddellik gestaak word.”
- Die Burger