Zuma en sy kabinet toets hul vir vigs
2010-03-12 06:56
Rajaa Azzakani, Die Burger
Kaapstad-Pres. Jacob Zuma, adj.pres. Kgalema Motlanthe en die hele kabinet gaan hulle vir MIV/vigs laat toets.
Die uitslae van die toetse sal egter nie bekend gemaak word nie tensy die betrokkenes toestemming gee, het Themba Maseko, hoofregeringswoordvoerder, gister gesê oor die regering se ’n nuwe plan om 15 miljoen Suid-Afrikaners teen Junie aanstaande jaar vir MIV/vigs te toets.
Tans word sowat 2 miljoen mense per jaar vir dié virus getoets.
Alle afgetrede mediese kundiges – onder wie dokters, verpleërs, aptekers – en selfs mediese studente in hul finale jaar en die weermag sal ingespan word om te help met die toetse en berading.
Dr. Aaron Motsoaledi, minister van gesondheid, het later gesê die regering sal nie jaar na jaar kan volhou om die begroting vir teenvigsmiddels te verhoog nie. Daarom sal baie groter klem op voorkomingsprogramme gelê word deur middel van inligting, onderrig, die verspreiding van kondome en die mobilisering van miljoene Suid-Afrikaners om te weet wat hul MIV/vigs-status is.
’n Dienspunt waar alle pasiënte hulle kan laat toets, sal by die ingange van alle gesondheidsinstellings beskikbaar wees. Dié geriewe sal toegerus wees om MIV-toetse te doen en teenvigsmiddels te verskaf.
Die veldtog sal op 15 April in Gauteng bekend gestel word.
Motsoaledi het gesê hy weet die regering se plan om die infeksiesyfer teen aanstaande jaar te halveer, klink soos om die berg Everest uit te klim. “Dit is nie kinderspeletjies nie, maar ons moet deurdruk.”
Hy het reeds briewe aan afgetrede mediese personeel geskryf en hulle aangemoedig om hulle by hul naaste gesondheidsgeriewe te registreer.
“Ons wil hulle spesifiek aanwend vir die vrywillige toetse en berading. Enige afgetrede dokter en verpleër sal weet hoe om dit te doen en ook hoe om die vingerprik-toets te doen.”
Die nie-regeringsektor het reeds 9 000 leke-beraders verskaf, maar hulle gaan hulp nodig hê.
“Ons benodig duisende van hulle. As ons universiteite hul finalejaarstudente vir net vyf dae aan ons beskikbaar kan stel, sal dit goed wees.”
Motsoaledi sal oor twee weke meer besonderhede oor die nuwe plan bekend maak.
-Die Burger