Zuma en nog 10 druip met ’n F
2011-12-13 07:27
Kaapstad – As pres. Jacob Zuma en sy kabinet ’n matriekklas was, sou bykans ’n derde van hulle vanjaar gedop het.
In die DA se jaarlikse rapport oor hoe die kabinet in 2011 gevaar het, is ’n F-simbool aan Zuma en tien van sy ministers toegeken.
Dit sluit in Sicelo Shiceka en Gwen Mahlangu-Nkabinde, wat verlede maand onderskeidelik as minister van samewerkende regering en van openbare werke uit hul poste geskop is.
Zuma self “druip” die toets as president, onder meer weens die land se voortgesette hoë werkloosheidsyfer, sy aanvalle op en “verpolitisering” van die regbank, sowel as binnegevegte in die ANC wat volgens die DA sy aandag van landsake aftrek.
Slegs Naledi Pandor, minister van wetenskap en tegnologie, het ’n A-simbool “verwerf”. In die verslag word sy as een van die mees hardwerkende ministers beskryf.
Drie van haar kollegas het ’n B-simbool behaal: Pravin Gordhan, minister van finansies, Susan Shabangu, minister van minerale hulpbronne, en Trevor Manuel, minister van nasionale beplanning in die presidensie.
Ander ministers wat F-simbole behaal het, is:
Siyabonga Cwele (staatsveiligheid) vir sy rol in die deurdryf van die omstrede Wetsontwerp op die Beskerming van Inligting, wat wyd beskou word as ’n poging om die media te muilband;
Tina Joemat-Pettersson (landbou, bosbou en visserye), wat onder skoot was weens haar duur hotelverblyf;
Nathi Mthethwa (polisie) is gekritiseer vir die “verswakkende gehalte van die polisiediens”;
S’bu Ndebele (vervoer) sukkel om die agterstand in die onderhoud van paaie in te haal;
Gugile Nkwinti (landelike ontwikkeling en grondhervorming) het misluk met grondhervorming en sukkel met grondeise;
Ebrahim Patel (ekonomiese ontwikkeling) is daarvan beskuldig dat hy deur ideologie gedryf word en die ekonomie in ’n verkeerde rigting stuur;
Collins Chabane (presidensie) hou nie sy kollegas toerekenbaar genoeg nie; en
Lulu Xingwana (vroue, kinders en mense met gestremdhede) is gekritiseer weens haar vele reise en “gebrek aan oordeel”.
Die DA se parlementêre leier, Lindiwe Mazibuko, het gesê ministers is nie net beoordeel op grond van hoe goed hulle hul eie beleid toegepas het nie, maar ook die gehalte van die beleid self ten einde Suid-Afrikaners se lewe te verbeter.
Hulle is verder gemeet aan hul aanwesigheid in die parlement, hoe goed hulle hul portefeulje bestuur, hul gedrag en hul toewyding aan toerekenbaarheid binne hul departement.
- Die Burger