Zuma dra dag op aan Struggle
2009-12-17 08:23
Jeanne-Marié Versluis
Johannesburg - “Ons het gedink die ANC het van ons vergeet, maar hy het onthou. Nou voel my hart beter.”
So het Anna Maseko (63) van Mamelodi-Wes in Pretoria gister gesê nadat pres. Jacob Zuma ’n landsvlag en ’n sertifikaat ter ere van Ezekiel, haar oorlede man, aan haar oorhandig het. Zuma het dié eerbewyse oorhandig aan die families van altesame 123 afgestorwe Gautengse vryheidsvegters in die apartheidsera. Altesame 60 lewende veterane is ook vereer.
Die vegters se name gaan op die Muur van Name by Vryheidspark in Pretoria gegraveer word.
Sowat 1 000 mense het die vieringe op Vryheidspark se snikhete koppie in die skadu van twee reuse-tente bygewoon.
Zuma het gesê vanjaar se Versoeningsdag word opgedra “aan die vergete helde in ons land se vrymaking, ons militêre veterane”.
Van die genooide gaste was in tradisionele drag en ander was gedas en gepak.
Verskeie dans- en sanggroepe, soos die Golden Youth Club van die Winterveldt, het springbokvelle om die skouers gehad en luid trom geslaan.
Maseko, wie se man in die Kerkstraat-bomontploffing in 1983 dood is, het aan Beeld gesê: “Ek is so trots. Ons het gedink mense het ons vergeet. Toe hy dood is, is ek met vyf kinders agtergelaat. Dit is erg as niemand jou loof vir jou werk nie,” het sy oor haar man gesê.
’n Landsvlag is ook ter ere van Philip Maseko, Maseko se neef, aan die familie oorhandig. Philip Maseko is in 1984 dood.
Sy dogter, Sibongile Maseko, het gister gesê die familie voel geëerd om “ná so ’n lang tyd van swaarkry erken te word”.
Haar pa was ’n uitgewekene in Swaziland en Tanzanië. Sy gaan die vlag in haar huis hou.
Zuma het gesê vryheidsvegters wat in ballingskap was, is met waardigheid en vriendskap in Zambië, Mosambiek, Angola, Uganda, Ethiopië en Algerië behandel.
Ná hul terugkeer het hulle die vergete helde van die struggle geword.
Talle leef in armoede in ’n land waarvoor hulle soveel opgeoffer het.
Om die militêre veterane se swaarkry te verlig, het die regering onlangs ’n taakspan aangestel vir die bestuur van dié mense se sake.
“Van die dienste vir veterane waarna gekyk word, is onderwys en opleidingsgeleenthede, maatskaplike dienste, gesondheid en ekonomiese bemagtiging,” het Zuma gesê.
Die taakspan se verslag sal vroeg volgende jaar aan die kabinet voorgelê word.
“Voormalige vryheidsvegters kwalifiseer nie vir die Oorlogsveterane-toelae nie, wat voorsien word aan voormalige SAW-veterane wat in die twee Wêreldoorloë en die Koreaanse oorlog geveg het,” het hy gesê.
“Ons verwag dat die Wysigingswetsontwerp op Spesiale Pensioene op ’n sekere manier sal help om probleme rondom spesiale pensioene op te los.”
- Beeld