Zuma dek 'slegs 5% vir sy nuwe huis'
2012-10-02 11:35
Kaapstad – Pres. Jacob Zuma se plaashuis op Nkandla in KwaZulu-Natal moet opgegradeer word sodat die woning beide sy personeellede en gaste kan huisves, het Mac Maharaj, die president se woordvoerder, gesê.
“Wat doen ‘n mens wanneer pres. (Barack) Obama of ‘n Afrika-staatshoof hom besoek? ‘n Mens kan hulle nie na ‘n hotel stuur nie,” het die woordvoerder aan die Verenigde Koninkryk se The Telegraph gesê.
“Waarheen gaan premier (David) Cameron se veiligheidspersoneel wanneer hy na sy privaat huis toe gaan? Pres. Zuma se mediese- en veiligheidspersoneel is in die kompleks, maar ‘n mens kan hulle nie in dieselfde huis as sy gesin sit nie.”
Die president kan nie verwag word om veiligheidspersoneel en sy gaste se verblyf uit sy eie sak te betaal nie.
City Press berig R203 miljoen van belastingbetalers se geld sal gebruik word om die huis op te gradeer. Die president sal slegs vir 5% van die rekening – sowat R10 miljoen – opdok
Die DA het ‘n beroep gedoen op die openbare beskermer, Thuli Madonsela, om die bewerings te ondersoek. Die opposisieparty het ook die president gevra om die opgradering te kanselleer.
Karima Brown, ‘n politieke kommentator, sê dié onbevestigde berigte is nog ‘n voorbeeld van hoe die media die president teiken.
Volg Nuus24 op Twitter
- SAPA
