Zuma beleef nagmerrie met treine eerstehands

2012-06-14 15:00

Johannesburg – Probleme by die passasierstreindiens Metrorail is nadelig vir Suid-Afrika se ekonomiese groei en ontwikkeling, het pres. Jacob Zuma gesê.

Hy het tydens ‘n toer van Gauteng se openbare vervoer se infrastruktuur gesê hy het eerstehands beleef wat duisende pendelaars elke dag moet verduur.

“Ek het dit self ervaar. Ek het met die werkers op die Metrorail-treine gepraat. Hulle het grootliks oor die treindiens gekla,” het hy gesê.

“Toe ek die Gautrein gebruik het, was dit ‘n ander ondervinding... Doeltreffend, vinnig... Hierdie is die tipe ontwikkeling wat Suid-Afrika benodig, alhoewel sommiges die ontwikkeling (van die Gautrein) gekritiseer het.”

Zuma het gesê openbare vervoerstelsels in die land moet verander.

“Pendelaars het gekla. Daar is vir my gesê dat die treine nie betroubaar is nie; daar is geen sekuriteit nie en soms stop hulle (die treine) in die middel van nêrens. Werkers sukkel om by die werk uit te kom; dit is nie goed vir die ekonomie nie,” het hy aan verslaggewers gesê.

Die president se toer is georganiseer sodat hy self kan sien hoe openbare vervoer in Gauteng tydens spitsverkeer lyk.

Volg Nuus24 op Twitter   

- SAPA