Zuma bekommerd oor kinders tydens WB
2010-05-22 12:15
Antoinette Pienaar, Beeld
“Om kinders te beskerm is ’n nasionale taak wat God ons opgelê het.”
So het president Jacob Zuma Vrydagoggend by die bekendstelling van Kinderbeskermingsweek in die Atteridgeville-gemeenskapsaal, wes van Pretoria, gesê.
Hy het gesê hy is hoogs bekommerd oor die miljoene kinders wat weens die verlengde skoolvakansie tydens WB 2010 sonder toesig kan wees.
Volgens Zuma is die regering bewus van die feit dat mensehandelaars die toernooi kan sien as ’n geleentheid om veral kinders en vroue te ontvoer.
Hy het simpatie met ouers en versorgers wat gaan sukkel om toesig vir hul kinders te reël, maar het daarop gewys dat daar deesdae ook ’n element van traak-my-nie-agtigheid by ouers is.
“As ons kyk hoe kinders byna daagliks by Durban as vermis aangemeld word (tydens die Desember-vakansie), dui dit op ’n graad van traak-my-nie-agtigheid.
Miskien raak kinders maar weg tussen so baie mense, maar ouers moet onthou, dié keer gaan daar mense kom om kinders te steel met die sokkeropwinding as dekmantel.”
Volgens Zuma is daar deesdae mense wat erger as diere is.
“Diere sal tot die dood toe baklei om hul kinders te beskerm. Destyds was daar nie weeskinders wat sonder kos of slaapplek rondgeslenter het nie, want hulle het families gehad wat na vore gekom het om na hulle om te sien.”
- Beeld