Zuma: 'Weeskinders, ouetehuise is Christenskap se skuld'
2011-12-21 12:02
Johannesburg – President Jacob Zuma het tydens die bekendstelling van 'n padveiligheidsprogram in KwaZulu-Natal, gesê Christenskap het die bestaan van weeskinders en ouetehuise teweeggebring, het The Times Woensdag berig.
"As Afrikane het ons ons eie manier gehad van dinge doen, lank voor die koms van godsdiens en die Bybel," het Zuma in sy toespraak by die bekendstelling gesê.
"Dit is die tye waarna godsdienstige mense verwys as die donker tye, maar ons weet dit was die tye waar daar geen weeskinders of ouetehuise was nie. Christenskap het al hierdie dinge teweeggebring," het hy gesê.
Zuma, wat in 2007 as 'n eervolle pastoor van die onafhanklike charismatiese kerke in Durban ingeseën is, het aan die skare gesê dat Suid-Afrikaners na "die ou manier van dinge doen" moet terugkeer, want moderne tye het gemeenskappe skade berokken.
Sy klaarblyklike kritiek teenoor Christenskap staan in skerp kontras met die ANC se geskiedenis om godsdienstige terminologie te gebruik in 'n poging om die party te bevorder.
Die ANC se hoofsweep, Mathole Motshekga, het Dinsdag gesê dat die party nodig het om onwrikbaar te regeer totdat Jesus eendag na die aarde terugkeer.
In Februarie vanjaar het Zuma stemme probeer win deur te sê dat mense wat vir die ANC stem, hemel toe sal gaan.
Ses maande vroeër het die ANC se leier in die Vrystaat, Ace Magashule, aan 900 ANC-afgevaardiges by 'n konferensie in Bethlehem gesê hulle moet Zuma volg op dieselfde manier waarop mense in die kerk vir Jesus volg.
In Desember 2008 het Magashule aan Volksblad gesê dat Zuma ly net soos wat Christus gely het.
"Jesus is vervolg. Hy is name genoem en verraai. Dit is dieselfde lyding waardeur mnr Zuma onlangs moes gaan, maar hy staan steeds sterk. Hy gee nie op nie."
Tydens Zuma se verkragtingsaak in 2006 het baie van sy ondersteuners plakkate gedra met slagspreuke wat gelui het: "Zuma is Jesus" en "Hoekom kruisig julle vir Zuma?"
Volg Nuus24 op Twitter.
- SAPA