Zuma: 'Tree streng op' teen moeilikheidmakers
2011-09-02 10:05
Johannesburg – Pres. Jacob Zuma het die polisie beveel om streng op te tree teen jeugdiges wat amok maak in die strate van Johannesburg, het The Star Vrydag berig.
Sy reaksie volg nadat ondersteuners van Julius Malema, president van die ANC-jeugliga, die afgelope week buite die ANC se hoofkwartiere in Johannesburg verwoesting gesaai het.
Zuma het die media toegespreek ná wat hy as ‘n baie suksesvolle besoek aan Noorweë beskryf het.
Jens Stoltenberg, die Noorweegse premier, het tydens die besoek aangebied om Suid-Afrika by te staan om ‘n suksesvolle COP17-klimaatskonferensie in Durban aan te bied later in die jaar.
Op ‘n vraag oor die gewelddadige betogings tydens die ANC se dissiplinêre verhoor teen Malema, het Zuma gesê hy wil die kwessie oor die algemeen aanspreek, aangesien hy nie persoonlik die betogings by Luthuli-huis gesien het nie.
“Ons aanvaar dit nie. Ek dink nie dit is goed vir demokrasie nie,” het hy gesê.
“As ons sê mense het vrye assosiasie en vryheid van spraak in 'n demokrasie, gee dit nie toestemming aan diegene wat voel hulle het die behoefte om... die strate te verwoes, vensters te breek en mense te slaan nie. Dit is nie demokrasie nie.
“Ek voel, en ek het vir die polisie ook gesê, dat daar baie streng opgetree moet word teen daardie mense, want hulle oortree die wet.”
Zuma het bygevoeg dat die betogings onaanvaarbaar is en dat dit inmeng met die regte van ander landsburgers.
“Ek dink nie dit is reg nie. En dit is wat ons as Suid-Afrikaners moet leer. Dat ons respek vir ander moet hê... Hierdie kultuur waarin daar nie respek vir diegene in magsposisies is nie is nie goed vir enige land nie,” het hy gesê.
Malema en vyf mede-beskuldigdes word dissiplinêr verhoor nadat hulle daarvan aangekla is dat hulle die ANC se naam in oneer gebring en onmin in die ANC gesaai het.
– Volg Nuus24 op Twitter
- SAPA