Zuma: 'Polisie het nie lisensie vir doodmaak'
2009-11-13 18:35
Kaapstad – Die polisie het nie ‘n lisensie om dood te maak nie, het president Jacob Zuma Vrydag gesê.
“Ek het verskeie media berigte opgemerk oor die gebruik van mag deur die polisie, wat met tye gelei het tot die verlies van lewens, insluitende die lewens van kinders,” het Zuma in ‘n verklaring gesê.
“Geen polisie-amptenaar het toestemming om verdagtes te skiet in omstandighede wat nie deur die wet toegelaat word nie. Die wet gee nie die polisie ‘n lisensie om dood te maak nie.”
Berigte van burgerlikes wat deur die polisie doodgeskiet is het aansienlik toegeneem sedert Zuma en sommige van sy ministers die polisie aangemoedig het om strenger teenoor kriminele op te tree.
In ‘n onlangse geval is ‘n polisiekonstabel in hegtenis geneem nadat hy glo ‘n driejarige kind, Atlegang Aphane, in Midrand doodgeskiet het. Die konstabel het gedink die metaal-pyp wat die kind vasgehou het was ‘n geweer.
Fikile Mbalula, die adjunk-minister van polisie, het Donderdag in ‘n toespraak gesê dat dit onvermydelik is dat burgerlikes in die kruisvuur tussen die polisie en kriminele sal sterf.
“In hierdie spesifieke situasie, waar jy in ‘n geveg met kriminele betrokke is, gaan onskuldige mense doodgaan. Nie met opset nie, maar in die kruisvuur. Hulle gaan aan die verkeerde kant gevang word, dit is onvermydelik,” het Mbalula aan verslaggewers in die parlement gesê.
Zuma het gesê dat die opmerkings wat deur regeringsleiers gemaak is “geensins ‘n instruksie is om van die reg af te wyk nie.”
“Opmerkings wat ek en ander regeringsleiers gemaak het aangaande die noodsaaklikheid om die omstandighede waaronder die polisie mag skiet uit te klaar, is geensins ‘n instruksie om van die reg af te wyk nie,” het Zuma gesê.
- Sapa