Albertina Sisulu langs haar Walter ter ruste gelê
2011-06-11 15:54
Johannesburg - Albertina Sisulu het Saterdag haar finale reis na die Coerus-begraafplaas in Johannesburg gemaak, waar sy langs haar man, Walter, ter ruste gelê is.
Die kis is deur lede van die nasionale weermag na die begraafplaas geneem, en 'n erewag het gereed gestaan om Sisulu 'n militêre afskeid te gee.
Familie en besoekers uit die buiteland het in 'n wit tent langs die graf gesit. Ruikers wit en pienk rose het om die graf gestaan, en die Suid-Afrikaanse vlag wat oor die kis gedrapeer is, is verwyder voor die kis laat sak is.
Emosionele familielede het ná die tyd 'n geleentheid vir 'n laaste eerbetoon gehad, met sommige wat rose in die graf gegooi het.
Verskeie regeringsamptenare het die seremonie bygewoon, insluitend Max Sisulu, speaker in die parlement, en sy dogter, Lindiwe Sisulu, die minister van verdediging.
Pres. Jacob Zuma en sy vrou, Nompumelelo Ntuli, adjunkpres. Kgalema Motlanthe, Winnie Madikizela-Mandela en die president van die ANC-jeugliga, Julius Malema, het ook die begrafnis bygewoon.
Zuma het vroeër Saterdag by die Orlando-stadion in Soweto gesê Sisulu se naam is sinoniem met die stryd vir vryheid, geregtigheid, menseregte en menslike waardigheid.
“Ons lê vandag 'n steunpilaar en moeder van die nasie ter ruste, wat die durf en moed gehad het om koloniale onderdrukking en apartheid te beveg, met medelye vir die armes en diegene wat onderdruk is,” het Zuma gesê.
Sisulu is verlede Donderdag in die ouderdom van 92 oorlede terwyl sy by haar huis gesit en televisie kyk het.
- Volg Nuus24 op Twitter.
- SAPA