Zuma: Malema nie in beheer van SA
2011-10-03 14:00
Johannesburg – Die ANC en die regering is in beheer van Suid-Afrika en nie Julius Malema nie, het pres. Jacob Zuma Maandag op 'n sake-ontbyt in Sandton gesê.
Zuma het gesê hulle het probeer om die leier van die ANC-jeugliga ná sy openbare aanmerkings te beheer en dat die ANC stappe teen hom geneem het omdat die party gevoel het hy ruk handuit.
Zuma het egter gou uitgewys dat die ANC nie sy leiers en lede sal keer om kwessies te lug nie.
Malema het openbare stellings gemaak oor die nasionalisering van myne en die beslaglegging op grond sonder vergoeding.
Malema en sy adjunk, Floyd Shivambu, word daarvan beskuldig dat hulle die ANC se naam deur die modder gesleep het toe hulle onlangs gedreig het om die regering van Botswana omver te werp.
Die ander leiers wat aangekla word sluit in Sindiso Magaqa, sekretaris-generaal; Ronald Lamola, adjunkpresident; Pule Mabe, tesourier; en Kenetswe Mosenogi, adjunk- sekretaris-generaal.
Die ses word ook daarvan beskuldig dat hulle verdeeldheid in die ANC saai.
– Volg Nuus24 op Twitter
- SAPA