Zuma: FW was ’n ‘verkrampte’ minister
2010-02-17 09:50
Rajaa Azzakani
Kaapstad - Oudpres. F.W. de Klerk moenie volle krediet kry vir die onderhandelings wat gelei het tot oudpres. Nelson Mandela se vrylating nie, omdat hy bloot ’n “verkrampte” minister was toe sy voorganger die proses begin het.
Pres. Jacob Zuma het Dinsdag in repliek op sy staatsrede beklemtoon dit was slegs toe oudpres. P.W. Botha deur ’n beroerte “platgeslaan is” dat De Klerk op die toneel verskyn het.
De Klerk het toe eers begin met geheime samesprekings met die ANC, wat 20 jaar gelede tot Mandela se vrylating en die ontbanning van die ANC en ander bevrydingsorganisasies gelei het.
Zuma het onlangs die wenkbroue laat lig toe hy op ’n ANC-vergadering in die Paarl gesê het dit was nie De Klerk se politieke visie wat tot Mandela se vrylating gelei het nie, maardie gewapende stryd.
Dit kom nadat Zuma erg onder kritiek deurgeloop het oor hy Botha in sy staatsrede tot “held-status” verhef het. Zuma het toe gesê dit was Botha wat die samesprekings oor die moontlike vrylating van politieke gevangenes begin het. Die president het Donderdag terselfdertyd hulde gebring aan De Klerk wat groot moed en deurslaggewende leierskap getoon het.
Zuma het gister gesê met sy verwysing na Botha, De Klerk en Kobie Coetzee, destydse minister van justisie, het hy nie bedoel om iets weg te neem van die oorwinning van die bevrydingsbeweging nie.
“Deur die feite te stel, beteken nie dat ons helde van hulle maak nie. Ons kan egter ook nie sê sekere apartheidsera-leiers is beter as ander nie. Die helde van Mandela se vrylating was die massas van ons mense wat die land onregeerbaar en apartheid onwerkbaar gemaak het.”
- Die Burger