Zuma: Dienslewering veel beter ná 1994
2012-04-27 17:57
Pretoria – Suid-Afrika het sedert die totstandkoming van 'n demokratiese bestel in die land aansienlike vordering gemaak in terme van toegang tot basiese dienste, het pres. Jacob Zuma Vrydag by 'n Vryheidsdag-byeenkoms in Pretoria gesê.
"Ons lei in hierdie verband die stryd om werkloosheid, ongelykheid en armoede uit te wis deur die bevordering van ekonomiese groei wat almal insluit," het hy gesê.
"Daar is al baie bereik in die uitbreiding van toegang tot basiese dienste sedert 1994 in 'n poging om Suid-Afrika om te keer, maar veel meer moet nog gedoen moet word."
Hy het gesê die land se vierde demokratiese administrasie se grootste uitdaging is om te verseker dat meer mense voordeel trek uit ekonomiese groei, terwyl voortgebou word op die sterkte van die ekonomie.
"In 1994 het ons geweet ons moeilikste taak sal wees om die ekonomie te transformeer sodat dit die verandering van die demokratiese regering weerspieël," het hy gesê.
"Die internasionale ekonomiese krisis in 2008 was 'n groot terugslag, veral op die gebied van werkskepping. Ons herstel steeds van dié afswaai."
Zuma het gesê die persentasie van die bevolking wat minder as R422 per maand verdien, en dus as arm beskou word, het van 50% in 1994 tot 34,5% in 2009 afgeneem.
In 1994 het slegs 50% van huishoudings toegang tot behoorlike sanitasie gehad, maar dié syfer het intussen gestyg tot 82%.
Toegang tot elektrisiteit het verbeter van 51% van die bevolking in 1994 tot 75,8% in 2011.
Zuma het egter gesê die regering het nog baie om te doen in terme van grondhervorming.
– Volg Nuus24 op Twitter.
- SAPA
