Zille vaar uit oor aanval op Mandela
2010-03-10 07:33
Philda essop
Kaapstad - As Winnie Madikizela-Mandela aan die stuur van sake in Suid-Afrika was, sou die land nou nog in ’n burgeroorlog vasgevang gewees het.
Só het Helen Zille, DA-leier, gister reageer op die siedende aanval wat Madikizela-Mandela in ’n Londense koerant op oudpres. Nelson Mandela gedoen het.
Zille het gesê dié uitsprake van Madikizela-Mandela is ’n bewys van wat Suid-Afrika in Mandela en oudpres. F.W. de Klerk het.
“Dit is ’n bewys van hoe anders dinge kon gewees het. As Winnie die septer geswaai het, sou ons nou nog in ’n burgeroorlog betrokke gewees het.
“Nou sien ons watter moed dit geverg het vir Mandela om nasiebou en versoening na te streef. As mense soos sy hul strategieë sou volg, sou daar net ’n verskroeide aarde gewees het. Daar sou niks oor gewees het nie, laat staan enige vordering, hetsy behuisingsprojekte .?.?. (of) die Wêreldbeker-sokkertoernooi. Daar sou net agteruitgang gewees het – baie erger as Zimbabwe.”
Ismail Mnisi, ANC-woordvoerder, het gister gesê die party het nog nie met Madikizela-Mandela gepraat oor die kommentaar wat in die onderhoud aan haar toegedig is nie.
“Sy is tans in Amerika en tot sy terugkeer na Suid-Afrika, sal die ANC nie reageer nie. Dit sal voortydig wees om kommentaar te lewer.”
’n Woordvoerder van die Nelson Mandela-stigting kon ook nie gister, ten spyte van herhaalde probeerslae en insluitend ’n e-pos-navraag, vir kommentaar bereik word nie.
-Die Burger