'Zille sou terugstaan vir Manuel'
2011-09-05 08:11
Jacques Dommisse en Jan-Jan Joubert
Kaapstad – Helen Zille, DA-leier, was in 2010 bereid om ten gunste van Trevor Manuel, minister in die presidensie, terug te staan as hy by die DA sou aansluit, maar hy het nie op die DA se toenadering gereageer nie.
Zille het Sondag met Die Burger gesels nadat Athol Trollip, die DA se parlementêre leier, daaroor uitgepraat het teenoor Donald Gips, Amerikaanse ambassadeur in Suid-Afrika, en die inligting daaroor in ’n vertroulike kabel aan die Amerikaanse regering versend is.
Media24 se ondersoekspan is in besit van die diplomatieke kabel, wat aan WikiLeaks gelek is en waarin besonderhede bekend gemaak word van gesprekke tussen Gips, ander Amerikaanse diplomate en Trollip.
Trollip het in Februarie 2010 aan Gips gesê “hy glo Manuel – die skerpste brein in die ANC – is ongelukkig in die ANC en het genoem dat Helen Zille, die huidige DA-leier, vir Manuel die partyleierskap sal gee as hy sou besluit om die skip te verlaat”, luidens die kabel.
Trollip het Vrydag gesê sy uitsprake, “met wie ook al ek gepraat het”, moet as ’n “metaforiese voorbeeld” beskou word.
Hy het ontken dat daar enige regstreekse gesprekke tussen DA-leiers en Manuel was.
“Ons as die DA is baie ernstig om ’n alternatiewe leierskorps tot die ANC te wees. Ons leierskorps is dus nie in klip gegiet nie. Ek kon net sowel (adj.pres.) Kgalema Motlanthe se naam ook genoem het.”
Zille het Sondag gesê die DA probeer deurgaans kontak maak met belowende mense wat die opposisie teen die ANC se vergrype kan versterk, en dat sulke kontak uiteraard vertroulik moet wees weens die sensitiewe aard daarvan.
“Dit is versigtige en dikwels langdurige kontak, wat soms slaag. Dit het byvoorbeeld vier jaar geduur om ’n uitstekende leier soos Patricia de Lille aan boord te kry, en kyk hoe sterk is haar bydrae nou.
“Politieke grense is nie altyd presies dieselfde as partygrense nie. Verskille loop dikwels in partye, en om te groei moet diegene met dieselfde oortuigings byeengebring word om buite die tradisionele grense saam te werk.
“Ek het al dikwels gesê ek sal terugstaan as daar iemand is wat die DA vinniger kan laat groei as ek. Wie dit kan wees, berus egter by DA-lede, nie by my nie.”
Dumisa Jele, Manuel se kantoorhoof, het gesê: “Die minister (Manuel) het geen kommentaar nie.”
Die Amerikaanse regering reageer nie op WikiLeaks-gelekte boodskappe nie.
Daniel Silke, ’n politieke kommentator, het gesê daar moet omsigtig met WikiLeaks-kabels omgegaan word en die konteks van gesprekke moet in ag geneem word.
Hy meen dat groei in die DA waarskynlik eerder deur ’n toekomstige breuk in die ANC, wat jare kan duur, aangevuur sal word.
Volg Nuus24 op Twitter.
- Die Burger