Zille soek weermag se hulp
2012-11-28 17:59
Kaapstad – Die Wes-Kaapse premier, Helen Zille, het die minister van verdediging, Nosiviwe Mapisa-Nqakula, gevra om die weermag in die Wes-Kaap te ontplooi, het RSG Woensdag berig.
Zille het gesê sy het aan die minister geskryf en haar gevra om 'n vredesrol in die Wes-Kaap te speel.
Die Wes-Kaap hou asem op vir nog moontlike stakings en gepaardgaande geweld.
Dit volg op die aankondiging van die minister van arbeid, Mildred Oliphant, dat sy die minimumloon vir plaaswerkers eers in April volgende jaar kan hersien.
Duisende werkers wat 'n dagloon van R150 eis, het twee weke gelede plaasinfrastruktuur afgebrand en paaie versper.
Zille sê sy het ook die Wes-Kaapse polisiekommissaris, Arno Lamoer, gevra om haar versoek te ondersteun.
Cosatu in die Wes-Kaap het die regering vroeër gevra om plaaswerkers te beskerm teen 'n private weermag wat boere na bewering teen die werkers wil inspan indien hulle volgende week weer staak.
Volg Nuus24 op Twitter.
