Zille 'sal bedank as daar korrupsie was'
2011-08-15 08:05
Kaapstad - Sy sal bedank indien daar korrupsie was, het Helen Zille, Wes-Kaapse premier, Sondag gesê oor bewerings van onreëlmatige tenderprosesse in die provinsiale regering.
Die Sunday Times het Sondag berig die premier se kantoor het glo ’n tender vir kommunikasiedienste aan al die provinsiale regeringsdepartemente wat glo sowat R1 miljard oor twee jaar beloop, toegeken sonder dat behoorlike prosedures gevolg is.
Zille het dit Sondag in ’n verklaring ontken en gesê sy “is vol vertroue die bodproses was deursigtig, regverdig en koste-doeltreffend”.
“Desnieteenstaande het ek die direkteur-generaal opdrag gegee om die ouditeur-generaal te versoek om ’n oudit van die tender-proses te doen.”
Daar word berig ’n interne dokument van die provinsiale tesourie het aangedui die tender-toekenning aan die betrokke maatskappy het gewys op “’n gebrek aan kontrolemaatreëls en beginsels van goeie regering”.
Die tender, glo vir kommunikasie-dienste in die departement van die premier, is eers vir R1,5miljoen in November verlede jaar toegeken en glo in Junie vanjaar weer aan dieselfde maatskappy toegeken – hierdie keer vir dienste aan al die provinsiale regeringsdepartemente.
Zille het Sondag in ’n verklaring gesê die R1 miljard wat die twee jaar-tender glo beloop, is ’n versinsel aangesien die geraamde begroting vir kommunikasie in die Wes-Kaapse regering tussen R50 miljoen en R70 miljoen per jaar is.
Sy het voorts gesê daar word nie verwys na die amptelike omsendbrief van die provinsiale tesourie wat sê die verkrygingsprosesse van die departement van die premier is nagegaan en sekere onreëlmatighede is gevind, maar dit is nie ernstig nie.
“Die Wes-Kaapse regering het niks om weg te steek nie.”
Cosatu het gesê hy gaan die Openbare Beskermer hieroor nader.
Tony Ehrenreich, provinsiale sekretaris, het gesê “dit lyk asof die premier ’n politieke verklaring gemaak het vir die tender om voort te gaan”.
“Die premier moet verantwoordelikheid aanvaar en die tender stop terwyl die kwessie ondersoek word.
“Dit wys hoe daar op gesofistikeerde manier skelm is eerder as die blatante skelmstreke waaraan ons gewoond is.”
Ehrenreich het ook bevraagteken hoekom miljoene rande belastingbetalersgeld gebruik word net “om die provinsiale regering te laat goed lyk terwyl armes ly”.
Alta van Zyl, Cope-LPP, het gesê die bewerings is skokkend.
Die ANC het ook aangedui hy gaan die kwessie ondersoek en hou vandag ’n nuuskonferensie oor sy plan van aksie.
– Volg Nuus24 op Twitter
- Die Burger