Zille pak skuld vir tenderprobleme op ANC
2011-08-21 08:45
Kaapstad – Helen Zille, die Wes-Kaapse premier, het Donderdag in die provinsiale wetgewer die probleme verwant aan tenderprosedures voor die deur van die nasionale ANC-regering gelê.
Zille se regering in die Wes-Kaap en veral Ryan Coetzee, haar spesiale raadgewer, het dié week onder skoot gekom ná ’n berig in die Sunday Times verlede week wat te kenne gee dat daar ongerymdhede met ’n tender vir kommunikasiedienste was.
Sy het Donderdag gesê die voorgeskrewe tenderproses van die regerende party in die land is ingewikkeld, met talle stappe in die proses wat dikwels probleme uitlig. Dan moet ’n proses opnuut aangepak word, soos in die geval van die provinsie se kommunikasietender.
“Ons (die Wes-Kaapse DA-regering) wil nuwe wetgewing bekend stel wat dieselfde doelwit het, maar die proses eenvoudiger sal maak sodat ons nie deur ’n oerwoud van regulasies moet strompel nie.”
Sy het toe haar visier op die opposisiebanke van die ANC gerig: “Op die oomblik voldoen ons aan die vereistes, andersins sou ons nie skoon oudits gehad het nie... Ons gaan die tenderproses verander sodat dit nie drie jaar neem om ’n kommunikasietender deur te voer nie.”
Zille het deur die loop van die week die Sunday Times daarvan beskuldig dat hy ’n opgedisde storie vir soetkoek opgeëet het.
Die koerant hou by sy beriggewing.
Die Sondagkoerant het beweer ’n tender om die provinsiale regering se handelsnaam te ontwikkel en te bemark is aan TBWA/Hunt Lascaris toegestaan, wat oor twee jaar meer as R1 miljard sou beloop, terwyl die aanvanklike tender vir R1,5 miljoen was.
Volgens Zille word die bedrag eerder geraam op tussen R50 miljoen en R70 miljoen wat strek oor al die departemente.
Die agentskap se verdienste teen 18% sal tussen R9 miljoen en R12 miljoen wees.
Lynne Brown, ANC-leier in die wetgewer, het Donderdag op ’n nuuskonferensie gesê dié antwoord is steeds nie goed genoeg nie.
“As dit die geval is, waarom al die geheimhouding? Tussen R50 miljoen en R70 miljoen is te vaag. Daar is ’n verskil van R20 miljoen en dit is baie geld! Hoeveel huise kan jy nie daarmee bou nie?”
Die ANC het intussen Coetzee se kop geëis ingevolge bepalings van die Staatsdienswet dat spesiale raadgewers nie met departementshoofde of senior bestuur mag raadpleeg nie, slegs met die uitvoerende gesag wat hulle dien.
Coetzee was ’n senior lid van die beoordelingskomitee van die tender. Die aanname is dat Coetzee met dié tenderproses ingemeng het by departemente se besluitneming oor of hulle die bod steun.
Die ANC het die openbare beskermer gevra om ondersoek in te stel.
Zille het ook die ouditeur-generaal gevra om die saak te ondersoek en aangebied om te bedank sou bedrog gevind word.
– Volg Nuus24 op Twitter
- Rapport