Zille nie welkom in Nkandla
2012-11-04 12:30
Nkandla – Die polisie het die DA-leier, Helen Zille, en haar gevolg Sondag verhoed om pres. Jacob Zuma se privaat woning in Nkandla te betree.
Dit is glo gedoen om Zille te beskerm
Zille het aan joernaliste gesê sy sal nie opgee nie, dat sy toestemming het om daar te wees en dat 'n groep ANC-ondersteuners geen toestemming het om die pad na Zuma se huis af te sper nie.
Sowat 700 m van waar die Demokratiese Alliansie gestop is, het die onluste-polisie probeer om 'n groep ANC-ondersteuners in bedwang te bring.
Beamptes het 'n menslike ketting gevorm in die pad waar Zuma se huis geleë is. Twee waterkanonne en verskeie njalas is ook in die gebied opgemerk.
Die liedjie “Awulethu mshini wami” (“Bring my masjiengeweer”) is ook gespeel terwyl sommige mense plakkate rondgedra het.
Agt mense het in die straat gelê en het geweier om te beweeg. ANC-ondersteuners het uit verskeie busse geklim, wat vroegoggend in die gebied aangekom het.
'n Polisiehelikopter sirkel in die gebied en beamptes het voertuie afgetrek en lisensies en die identiteite van mense nagegaan.
Die DA het Donderdag gesê hy beplan om Zuma se privaat woning te besoek, waar R200 miljoen se opknappingswerk tans gedoen word.
Zille en ander amptenare van die DA sal die paaie om die eiendom ondersoek, en ook probeer om die eiendom binne te gaan.
Die ANC en sy bondgenote het dié besluit gekritiseer.
Die Suid-Afrikaanse Kommunistiese Party (SAKP) het Saterdag gesê Zille se beplande besoek is deel van 'n regse, rassistiese agenda.
– Volg Nuus24 op Twitter
