'Zille moet saam met ministers werk' – Zuma
2012-11-15 13:23
Kaapstad – Helen Zille, premier van die Wes-Kaap, moet nasionale ministers direk nader om met die provinsie se arbeidsonrus te help, het pres. Jacob Zuma gesê.
“Ons wil graag uitwys dat die premier toegang het tot... nasionale departemente wat aan die saak werk, soos arbeid, landbou, bosbou en visserye en Suid-Afrika se polisiedienste,” het die president se woordvoerder, Mac Maharaj, gesê.
“Die premier moet dus saam met haar kollegas – die departemente in die relevante portefeuljes – werk om die hulp wat sy benodig, te bespreek.”
Zille het vroeër die week ‘n brief aan Zuma geskryf, waarin sy die president versoek het om by die De Doorns-loondispuut in te gryp.
Druiwe-insamelaars het verlede week by De Doorns begin betoog en ‘n loon van R150 per dag geëis. Die meeste van hulle verdien tans tussen R69 en R75 ‘n dag.
Die hoogste aanbod wat boere sedertdien gemaak het, is R80.
Daarna het die onrus na ander landelike gebiede oorgespoel en protesoptogte het in 16 dorpe plaasgevind.
Die departement van arbeid het Woensdag aangekondig dat die plaaswerkers ooreengekom het om hul staking vir twee weke op te skort, sodat onderhandelings kon plaasvind.
Betogings is egter weer in sekere gebiede aangemeld.
Volg Nuus24 op Twitter
- SAPA
