Zille laat water loop oor DA-akker
2011-06-27 07:08
Kaapstad. – Sy gaan nie inmeng by die skynbare stryd om die parlementêre leierskap wat in die DA woed nie.
Só het Helen Zille, DA-leier, gister gesê nadat die wedywering om dié posisie glo Donderdag op dié party se koukusvergadering ter sprake gekom het.
Die party kies in November ’n nuwe parlementêre leier, maar drie name word reeds genoem as aanspraakmakers op dié pos.
Onder hulle is Lindiwe Mazibuko, nasionale woordvoerder, Athol Trollip, nou die parlementêre leier, en dr. Wilmot James, nasionale voorsitter.
Ingevolge ’n koukusreël moet die DA ’n nuwe parlementêre leier in die helfte van die party se vyfjaar-termyn kies.
Trollip het luidens ’n berig in die Sunday Times glo gevra vir ’n “blitskoukusverkiesing” om sy posisie te beveilig.
Dié idee is na berig word deur ’n ondersteuner van Mazibuko afgeskiet.
Mazibuko geniet glo ’n mate van steun onder haar kollegas om by Trollip oor te neem, terwyl ander meen sy is nog te onervare.
Sy was baie prominent in die munisipale verkiesing toe sy saam met Zille en Patricia de Lille, burgemeester van Kaapstad, op verkiesingsplakkate gepryk het.
Zille het gister by navraag gesê sy gaan nie inmeng nie.
“Ek is heeltemal tevrede dat die DA diep demokratiese beginsels het en dat enige ontwikkelings demokraties en volwasse hanteer sal word.”
Trollip het gesê wat in die koukusvergaderings gebeur, “bly daar” omdat dit vertroulike byeenkomste is.
Hy glo nie daar is enige “ongemaklikheid” ten opsigte van die verkiesing nie.
“Soos enige verkiesing binne partyverband vind werwery plaas.
Party mense steun een kandidaat, terwyl ’n ander kandidaat aanklank vind by ander partylede.
Dit is so dat die temperatuur in so ’n verkiesing kan styg, maar ons is ’n demokratiese organisasie en respekteer die uitslag van verkiesings en die lewe gaan aan.”
Trollip meen sy kanse is goed om as parlementêre leier herkies te word, maar “geen benoemings is nog gemaak nie”.
– Volg nuus24 op Twitter.
- Beeld