Zille kap LP oor Lindiwe
2011-10-31 08:00
Kaapstad – Helen Zille, DA-leier, het een van haar eie parlementslede wat ’n rassistiese opmerking oor Lindiwe Mazibuko gemaak het behoorlik die kop gewas en hom van “Verwoerd-logika” beskuldig.
Sy het Masizole Mnqasela, DA-LP, ook daarvan beskuldig dat hy ’n gek van hom en die party gemaak het deur te sê Mazibuko is nie swart genoeg om die DA se parlementêre leier te word nie.
Mazibuko is Donderdag tot dié pos verkies.
Mnqasela het Mazibuko se aksent verlede week in ’n radio-onderhoud gekritiseer.
Hy het Mazibuko se benoeming “uiterlike vertoon” genoem en gesê as “iemand sy oë toemaak en na Mazibuko luister, sal jy sê dit ’n wit persoon wat met jou praat”.
Zille het Sondag in SA Today, die party se weeklikse aanlyn- nuusbrief, geskryf sulke rassisme het geen plek in Suid-Afrika nie, nog minder in die DA.
Mnqasela is ’n ondersteuner van Athol Trollip, die vorige parlementêre leier teen wie Mazibuko Donderdag in die koukusverkiesing te staan gekom het.
Zille het Mazibuko verdedig en gesê sy het nie een keer in haar verkiesingsveldtog gesê die koukus moet háár kies omdat sy swart is nie.
“Masizole het Athol ’n groot onguns bewys deur sulke Verwoerd-logika in die veldtog vir die parlementêre leierskap in te bring.”
Dié uitlatings is volgens Zille nie net ’n belediging vir Trollip se lang geskiedenis van nie-rassigheid en sy toegewyding aan die DA se waardes nie, maar dit blyk dat dit ’n bepalende rol in die veldtog gespeel het.
Mnqasela, LP van Guguletu, het Mazibuko én Zille tydens die veldtog in ’n lang verklaring in skerp taal aangeval.
Hy het in reaksie op Zille se kritiek gesê hy “het niks om terug te trek nie en staan by elke woord”.
“Verwoerd was die argitek van apartheid en het alles wat anti-wit was vernietig en dit as die vyand beskou.
Ek word nou as die vyand beskou. Ek het gedink almal sal ná die verkiesing verenig, maar in plaas daarvan voer die leier ’n skerp aanval op my en ander uit.
Ek hoop ons kan sit en dit bespreek. Die onverdraagsaamheid van verskillende menings is anti-DA.”
Zille het Mnqasela bygestaan toe hy vroeër vanjaar in die Wynbergse landdroshof op aanklag van verkragting tereggestaan het.
Hy is vrygespreek.
– Volg Nuus24 op Twitter
- Die Burger